लण्डन । बेलायतको मुख्य दुई राज्य इङ्ल्याण्ड र वेल्समा नेपाली भाषा मूल भाषा हुनेहरूको संख्या ७४ हजार पुगेको छ ।
सन् २०२१ मा सम्पन्न जनगणनाअनुसार ती दुई राज्यमा नेपाली भाषा बक्ताको करिब ४१ प्रतिशतले वृद्धि भई ७४ हजार ३६८ पुगेको छ ।
सन् २०११ मा ती दुई राज्यमा नेपाली बोल्नेको संख्या ५२ हजार ७८५ मात्र थियो ।
त्यसो त भाषा वक्ताको संख्यामा उल्लेख्य वृद्धि भए पनि ती दुई राज्यमा नेपाली भाषाको स्थान भने यथावत रहेको छ । इङल्याण्ड र वेल्समा सन् २०११ मा नेपाली भाषा २१औँ स्थानमा रहेकोमा यस जनगणनापछि पनि सोही स्थानमा रहेको छ ।
सबैभन्दा धेरै नेपाली भाषा बोलिने क्षेत्र रसमोर हो । फार्नब्रो, अल्डरसट पर्ने रसमोरमा नेपाली भाषा वक्ताको संख्या ८ हजार ५७१ रहेको छ । अल्डरसटमा गोर्खा सैनिकहरूको क्याम्प धेरै पहिलदेखि नै रहेकाले अवकासपछि गोर्खा सैनिकहरू त्यहीँ बस्न थाले । अहिले सो क्षेत्र नेपालीहरूको अधिक बसोबासका कारण ‘मिनी नेपाल’ जस्तै छ ।
दोस्रो धेरै नेपाली वक्ता दक्षिण पूर्वी लण्डनको ग्रीनीचमा छन् । उलीच, प्लमस्टिड, चार्ल्टन जस्ता नेपालीहरूको घना बसोबास पर्ने सो क्षेत्रमा ५ हजार ८५४ जना नेपाली वक्ता छन् ।
तेस्रोमा भने रेडिङ परेको छ जहाँ नेपाली भाषीको संख्या ४ हजार १४७ रहेको छ ।
वेल्समा भने सबैभन्दा धेरै नेपाली वक्ता पोवीज क्षेत्रमा रहेका छन् । त्यहाँको ब्रेकनमा गोरखा आर्मीको ब्यारेकसमेत रहेकोले अवकासपछि गोरखाहरू त्यही बस्न थालेका छन् । त्यहाँ नेपाली वक्ताको संख्या ३६८ रहेको छ । त्यसपछि धेरै नेपाली वक्ता कार्डिफमा छन् ।
बेलायतका अरू दुई राज्यमध्ये स्कटल्याण्डमा गत वर्ष जनगणना कोभिडका कारण स्थगन गरिएको थियो । यो साल मात्र त्यहाँ जनगणना सम्पन्न भएको छ । तथापि त्यहाँ नेपाली वक्ताको संख्या धेरै छैन । सन् २०११ को जनगणनामा १ हजार २६८ मात्र थियो । उता उत्तरी आयरल्याण्डमा त झन् न्यून संख्याका कारण सन् २०११ को जनगणनामा रेकर्डसमेत राखिएको थिएन ।
यी हुन् १ हजारभन्दा बढी नेपाली भाषी रहेका १९ स्थान
| क्रस | स्थान | संख्या |
| १ | रसमुर | ८५७१ |
| २ | ग्रीनीच | ५८५४ |
| ३ | रेडिङ | ४१४७ |
| ४ | हाउन्स्लो | ३४७१ |
| ५ | आसफोर्ड | ३१८७ |
| ६ | इलिङ | २४४२ |
| ७ | स्वीण्डन | २२७२ |
| ८ | विल्सायर | २१७२ |
| ९ | मेडिस्टोन | १९६९ |
| १० | बेजिङस्टोक र डिन | १९५५ |
| ११ | फोल्कस्टोन | १९३८ |
| १२ | हिलिङडन | १९२४ |
| १३ | ब्रेन्ट | १३५१ |
| १४ | ह्यारो | १३२७ |
| १५ | ब्राकनेल फोरेष्ट | १२५६ |
| १६ | ननिटन र बेडवर्थ | १२२७ |
| १७ | बेक्स्ली | ११६६ |
| १८ | रिच्मण्डसायर | १०६० |
| १९ | सरे हिथ | १०२२ |
