इङल्याण्ड र वेल्समा श्वेतहरूको संख्या घट्यो, एसिएनहरू दोस्रो ठूलो संख्यामा

तस्वीर घेट्टी इमेजेज

लण्डन । इङल्याण्ड र वेल्समा श्वेत (ह्वाइट) हरूको संख्या घटेको पाइएको छ भने एसिएनहरु दोस्रो ठूलो संख्यामा रहेको खुलासा भएको छ ।

गत वर्ष (२०२१) सम्पन्न राष्ट्रिय जनगणनाको जातजाति तथा धर्मसम्बन्धी मंगलबार प्रकाशित तथ्याङ्क अनुसार इङल्याण्ड र वेल्समा श्वेतहरूको संख्यामा ८१.७ प्रतिशतमा झरेको छ । सन् २०११ को जनगणनामा उनीहरूको संख्या ८६ प्रतिशत रहेको थियो । आफूलाई इङ्लिस, वेल्स, स्कटिश, नर्देन आइरिस वा ब्रिटिश भनेर चिनाउनेको संख्या पनि बितेको १० वर्षमा ७.५ प्रतिशतले घटेको छ ।

उता एसिएनहरुको संख्या भने विगतको जनगणनाको तुलनामा करिब २ प्रतिशतले बढेको छ । सन् २०११ मा ४२ लाख एसिएनहरुको संख्या रहेकोमा यस पटकको जनगणनामा ५५ लाख पुगेको छ । एसिएनहरूमा चिनियाँबाहेक बंगलादेशी, पाकिस्तानी, भारतीय र अन्य एसिएनहरुको संख्या विगत १० वर्षमा उल्लेख्यरूपमा बढेको पाइएको छ ।  

यसैगरी, अश्वेत (अफ्रिकन, क्यारेबियन) हरुको संख्या पनि केही बढेको छ । गत जनगणनामा उनीहरुको संख्या १.९ प्रतिशत रहेकोमा यस पटकको जनगणनामा उनीहरुको संख्या ३.३ प्रतिशत पुगेको छ । यसमध्ये पनि अफ्रिकी मुलुक मूल थलो भएकाहरूको संख्या बढेको छ भने क्यारेबियन मूल थलो हुनेहरूको संख्या घटेको छ ।

श्वेतहरूमा पोलिस र रोमानियनहरूको संख्या बढेको पाइएको छ । पोलिसहरूको संख्या ६ लाख १४ हजार र रोमानियनहरूको संख्या ३ लाख ४३ हजार पाइएको छ ।

बेलायतका चार राज्यहरुमध्ये इङल्याण्ड र वेल्सको जनगणना एउटा निकायले गर्छ भने स्कटल्याणको अलग्गै कार्यालयले र उत्तरी आयरल्याण्डको अलग्गै कार्यालयले गर्ने गर्छ ।

प्रतिक्रिया

सम्बन्धित सामाग्री