बजेटमा सकारात्मक र नकारात्मक दुवै पक्ष छन् । धेरै कमाउनेहरुलाई कर लगाइनु राम्रो हो । जस्तो अहिले १ लाख २५ हजार १४० पाउण्डमाथि वार्षिक तलब भएकाहरुलाई ४५ प्रतिशत कर लगाउने घोषणा गरिएको छ । यस्तै, उर्जा उत्पादकहरुलाई पनि कर बढाएर २५ बाट ३५ प्रतिशत बढाइनु साथै अर्को वर्षदेखि ४५ प्रतिशत पुर्याउने निर्णय गर्नु राम्रो कुरा हो । उर्जा उत्पादन गर्ने कम्पनीहरु राज्यको हुनुपथ्र्यो तर यहाँ नीजि कम्पनीहरु छन् । उनीहरुलाई पनि अफ्ठेरो समयमा राज्यलाई थप योगदान दिन लगाउनु राम्रो पक्ष हो । बजेटमा भएको अर्को राम्रो पक्ष न्यूनतम ज्याला वृद्धि गरी १०.४२ पाउण्ड पुर्याइनु हो । यसले धेरै जागिरेहरुलाई मुद्रास्फितिसित जुध्नलाई सहयोग गर्ने छ ।
स्वाभाविक रुपमा यो बजेटमा कसरी सरकारी कोष बढाउने उपायहरु खोजी गरिएको छ । त्यसको अर्थ हुन्छ सरकारले राष्ट्रिय ढिकुटीबाट थप सापटी वा ऋण नलिई त्यो स्रोत व्यक्ति वा कम्पनीबाट लिन खोजिएको छ । त्यसो हुँदा कसै न कसैले थप कर तिर्नुपर्ने हुन्छ । त्यो यो बजेटको नकारात्मक पाटो हो । किनकि कसैले पनि बढी कर तिर्न त चाहँदैन तर त्यसलाई आफूमा मात्र सीमित नराखी धेरै ऋण लिँदा त्यसले समग्रमा समाजलाई कस्तो असर पार्छ भन्ने तर्फ विचार पुर्याउने हो भने नकारात्मक भन्न पनि मिल्दैन ।
समग्रमा यो बजेट यसअघिका अर्थमन्त्रीले ल्याएको भन्दा धेरै राम्रो छ । पहिलाको बजेटले पुर्याएको असर पूर्ति गर्ने उद्देश्यबाट आएको छ । वर्तमान अर्थमन्त्रीले अहिलेको जटिल आर्थिक अवस्थाबाट पार पाउन चलाखीपूर्ण नीति ल्याएका छन् ।
