बेलायतको अर्थ मन्त्रीमा जेरेमी हन्ट नियुक्त

लण्डन । बेलायतको नयाँ अर्थ मन्त्रीमा जेरेमी हन्ट नियुक्त भएका छन् ।

बेलायती प्रधानमन्त्री लिज ट्रसले आजै अमेरिका भ्रमणमा रहेका तत्कालिन अर्थ मन्त्री क्वाजी क्वाटेङलाई बर्खास्त गरेकी थिइन् । रिक्त पदमा उनले तत्काल जेरेमी हन्टलाई नियुक्त गरेकी छिन् ।

हन्ट सत्तारुढ कन्जरभेटिभ पार्टीका भेटेरान सांसद हुन् । उनले यसअघि विदेश मन्त्री, स्वास्थ्य मन्त्री, सँस्कृति मन्त्री लगायतको जिम्मेवारी सम्हालिसकेका छन् ।

यसअघिका प्रधानमन्त्री बोरिस जोन्सनसित पार्टी नेताको चुनावमा अन्तिम दुईमा पुगेका हन्ट लिज ट्रससित पनि प्रतिस्पर्धामा थिए तर उनले अन्तिम दुईसम्म पुग्न पाएनन् ।

यस्तै चिफ सेक्रेटरी अफ ट्रेजरी क्रिस फिलिप्सलाई पनि प्रधानमन्त्री ट्रसले हटाएकी छिन् । उनको ठाउँमा एड अर्गरलाई नियुक्त गरेकी छिन् ।

हन्ट र अर्गर दुवैले सत्तारुढ दलको नेताका लागि भएको चुनावमा ऋषि सुनकलाई समर्थन गरेका थिए ।