काठमाडौँ । सिजनल वर्कर भिसामा बेलायत पठाइदिन्छु भन्दै विभिन्न व्यक्तिलाई लोभ देखाएर ठगी गरेको आरोपमा नेपालमा एक व्यक्ति पक्राउ परेका छन् ।
बेलायत पठाइदिने लोभ देखाएर रु १५ लाख ठगी गरेको अभियोगमा काठमाडौँ महानगरपालिका–२९ सामाखुसी बस्ने इलामका ३७ वर्षीय प्रकाश राईलाई प्रहरीले पक्राउ गरेको छ ।
राईले पाँच जनालाई सिजनल भिसामा बेलायत जानका लागि प्रतिव्यक्ति रु ९ लाख लाग्ने र त्यहाँको कम्पनीमा रु चार लाख तलब हुन्छ भनी लोभ देखाएर पाँच जनाबाट प्रतिव्यक्ति रु तीन लाख ठगी गरेको खुल्न आएको छ ।
त्यसपछि फरार रहेका उनलाई उपत्यका अपराध अनुसन्धान कार्यालयबाट खटिएको प्रहरीले सिनामङ्गलबाट पक्राउ गरेको हो । उनलाई थप अनुसन्धान तथा कारबाहीका लागि वैदेशिक रोजगार विभाग बुद्धनगरमा पठाइएको छ ।
बेलायतमा सिजनल वर्करका रुपमा नेपाली कामदारहरु आउन थालेपछि ठगी गर्नेहरु सल्बलाउन थालेका छन् । उनीहरुले विभिन्न बहानामा शुल्क लिने गरेको समाचार यसअघि बेलायतबाट प्रकाशन हुने गार्डियन पत्रिकाले पनि प्रकाशित गरिसकेको छ । तर सिजनल वर्कर भिसामा लाग्ने शुल्क र प्रक्रियाका बारेमा बेलायत सरकारको वेभसाइट gov.uk मा सबै जानकारी पाउन सकिन्छ ।
