सहकर्मीको श्रीमतीलाई सताउने गोरखा सैनिकलाई कार्बाही

लण्डन । सेवाका क्रममा श्रीमान देशबाहिर भएको मौका पारी आफ्नै सहकर्मीकी श्रीमतीलाई सामाजिक सन्जालमा म्यासेज पठाउँदै सताएको अभियोगमा एक सेवारत गोरखा सैनिक कार्बाहीमा परेका छन् ।

बुलफोर्ड सैनिक अदालतले उनलाई सहकर्मीकी श्रीमतीको नजिक जान प्रतिबन्ध लगाउनुका साथै घटुवा पनि गरेको छ ।

डेली मेलका अनुसार ३४ वर्षीय विवाहित सार्जेन्ट बमप्रसाद लुम्बाले सहकर्मीकी श्रीमतीलाई चार महिनाको अवधिमा २७ पटक फोन गरेका थिए । यसका साथै सामाजिक सन्जालमा पनि ‘म खाना खान कहिले आउँ’ भन्दै धेरैपटक म्यासेज पठाएका थिए ।

ती सैनिककी श्रीमतीले त्यस्ता म्यासेज पठाउन बन्द गर्न पटकपटक आग्रह गर्दा र सामाजिक सन्जालमा ब्लक गर्दा पनि लुम्बाले नयाँ नयाँ प्रोफाइल बनाउँदै सताउने गरेको अदालतमा बताइएको छ । फोन गर्ने व्यक्तिको परिचय लुकाउँदै उनले पटकपटक फोन गरेको पनि अदालतमा बताइयो ।

लुम्बालाई अहिले कारबाही गरी सार्जेन्टबाट कर्पोरलमा झारिएको छ ।

सजायँ सुनाउँदै न्यायाधीश रोबर्ट हिलले सेवामा देशबाहिर गएका गोरखाको श्रीमतीको सहकर्मी गोरखा सैनिकले हेरचाह गर्नु पर्नेमा रोमान्सका लागि फकाउनु सैन्य समुदायमा स्वीकार गर्न नसकिने घटना भएको बताए ।

लुम्बा क्वीन्स ओन गोरखा लजिस्टिक रेजिमेन्टमा कार्यरत छन् । उनी विवाहित हुन् ।

लुम्बाका वकिलले लुम्बाले खराब नियतले त्यसो नगरेको तर दुर्भाग्यपूर्ण घटना बताएका छन् ।

पीडितले अदालतबाट आफूमाथि न्याय नपाएको बताएकी छिन् । उनले आफ्नो घरमै डराएर बस्नुपरेको, काममा जाँदा पनि सुरक्षाका लागि साथीभाइसित जानु परेको बताएकी छिन् ।