लण्डन । लोकप्रिय गायक राजेश पायल राईको बेलायतमा एकल साँगीतिक कार्यक्रम हुने भएको छ ।
किरात राई यायोख्या बेलायतको आयोजनामा जुलाई २४ तारिखका दिन सो कार्यक्रम हुन लागेको आयोजकहरुले आज जानकारी दिएका छन् ।
कार्यक्रम संयोजक यायोख्याका उपाध्यक्ष क्याप्टेन रिटायर्ड सुमनचन्द्र राईका अनुसार सो कार्यक्रम अल्डरसटस्थित एम्पायर हलमा आयोजना हुनेछ । राजेश पायल राईले लाइभ ब्याण्डका साथमा सो कार्यक्रममा करिब २५ वटा गीत गाउने आयोजकले बताएका छन् ।
करिब साढे दुई घण्टा चल्ने सो कार्यक्रममा गायक राजेश पायल राईलाई सम्मान समेत गरिने छ ।
कार्यक्रममा करिब १ हजार जनाको उपस्थिति रहने आयोजकको अपेक्षा छ ।
कार्यक्रमबाट बचेको रकम कला र कलाकारको सम्मान, किरात राई समुदायको भलाइ, परोपकार र कल्याणको कार्यमा खर्च गरिने बताइएको छ ।
नेपाली सुगम संगीतमा लामो समयदेखि एउटा विशिष्ट स्थान बनाएका गायक राजेश पायल राईको सो सांगीतिक कार्यक्रम राई समुदाय मात्र नभई समग्र नेपालीहरुका लागि र सबै उमेर समूहका लागि सुहाउँदो हुने बताइएको छ ।
पत्रकार सम्मेलनमा कार्यक्रम संयोजक राईले कार्यक्रमलाई सफल बनाउन हुन सबैलाई हार्दिक अपील गरेका थिए ।
