बेलायती महारानीको ‘प्लाटिनम जुब्ली’मा दुई नेपालीलाई पदवी

लण्डन । बेलायती महारानी एलिजाबेथ द्वितीयाको गद्दी आरोहणको प्लाटिनम जुब्लीको अवसरमा बेलायतमा कार्यरत दुई नेपाली मूलका मानिसले सम्मान पाएका छन् ।
यसरी सम्मान पाउनेहरुमा फ्रिम्ली हेल्थ एनएचएस ट्रष्टका प्रोफेसनल लिड सुमनराज श्रेष्ठ र प्रसारण प्राविधिक इन्द्रप्रसाद लिम्बु रहेका छन् ।
ब्रिटिश फोर्सेस ब्रोडकास्टिङ सर्भिसमा कार्यरत लिम्बुलाई सैन्य सेवाका लागि मेम्बर अफ अर्डर अफ द ब्रिटिश इम्पाएर (एमबीई) सम्मान दिइएको छ भने रोयल कलेज अफ नर्सिङ एण्ड नर्स कन्सलट्यान्ट इन क्रिटिकल केयरका प्रोफेसनल लिड श्रेष्ठलाई क्रिटिकल केयर नर्सिङमा पुर्याएको योगदानका लागि मेम्बर अफ अर्डर अफ द ब्रिटिश इम्पाएर (एमबीई) दिइएको छ ।

४३ वर्षीय श्रेष्ठ २१ वर्षदेखि क्रिटिकल केयर क्षेत्रमा कार्यरत रहेका छन् । उनी युनिभर्सिटी अफ ब्राइटनमा क्रिटिकल केयर कोर्सका भिजिटिङ लेक्चरर पनि छन् । लिम्बु ब्रिटिश फोर्सेस ब्रोडकास्टिङ सर्भिसमा कार्यरत रहेका छन् ।
महारानीको प्लाटिनम जुब्लीका अवसरमा १ हजार १३४ जनालाई विभिन्न पदवी दिइएको छ ।