लण्डन । कोरोना भाइरसका कारण विश्व महामारीको चपेटामा पर्दा करिब दुई वर्ष ठप्प रहेको बेलायतको नेपाली समाजमा फेरि गतिविधिहरु बढ्न लागेका छन् ।
समाजको सक्रियतासँगै मनोरञ्जन दिलाउनका लागि नेपालबाट कलाकारहरु पनि बेलायत आउने क्रम बढ्न थालेको छ ।
यो समाचार तयार गर्दासम्म करिब एक दर्जन नेपाली कलाकारहरु बेलायत आइपुगेका छन् भने त्यो भन्दा ठूलो संख्या बेलायत जाने प्रक्रियामा छन् ।
कोरोना भाइरस साम्य भएपछि गायिका एलिना गुरुङले पहिलोपटक बेलायत आउने मौका पाइन् । उनीपछि नेपाली समाज नटिंघमको निमन्त्रणामा दोहोरी गायिका अस्मिता डल्लाकोटी र गायक विशाल रायमाझी बेलायत आए । यसैगरी, शिव मन्दिर अल्डरसटको च्यारिटी डिनरका लागि गायक कृष्ण अखिली र गायिका तुलसा क्षेत्री बेलायत आए । यस्तै, बाग्लुङे समाज युकेको वार्षिक भेटघाट कार्यक्रमका लागि गायक रेशम निर्दोष र गायिका अनुपा मगर बेलायत आएका छन् ।
सृजनशील नेपाली समाज युकेको कार्यक्रमका लागि ग्रेटर रसमुर नेपाली कम्युनिटीको निमन्त्रणामा गायिका शान्ता रानी परियार, मोडल तथा नृत्याङ्गना रिना थापामगर बेलायत आइपुगेका छन् भने हाँस्यकलाकार निर आले र गायक बिलन थापा बेलायत आउने तयारीमा छन् । गायिका भूमिका शाह पनि कार्यक्रमकै लागि बेलायत आइपुगेकी छिन् भने गायक बिरु लामा पनि बेलायतमै छन् ।
सुनगाभा इन्टरटेण्मेण्टको निमन्त्रणामा भ्वाइस नेपालका विजेता गायक राम लिम्बु र अर्की प्रतिस्पर्धी गायिका सञ्जु मोक्तान पनि बेलायत आउँदैछन् ।
यसैगरी, म्याग्दी ओभरसिज नेपाली एसोसिएसन (मोना) युकेको निमन्त्रणामा गायिका विमला श्रीश र हेमन्त कान्छा रसाइलीको भिसा लागिसकेको छ । यस्तै, पुन समाज युकेको निमन्त्रणामा गायक गगन पुन र गीता पाइजा पनि बेलायत आउने तरखरमा छन् ।
मगर संघ युकेले भ्वाइस अफ नेपालका फाइनालिष्ट गायिका तारा श्रीश, चर्चित गायक प्रकाश सपुत र नेपाल आइडलका विजेता गायक भूपेन्द्र थापामगरलाई बेलायतमा ल्याउन लागेको छ ।
उता गुल्मी जिल्ला समाज युके र स्याङजा समाज युकेले पनि वार्षिक भेटघाटका लागि दुई/दुई जना कलाकार बेलायत ल्याउने निर्णय गरी प्रक्रिया शुरु गरिसकेको छ ।
बेलायतमा बसोबासरत गायक मनसुधन थापामगर कोभिड महामारीका कारण करिब दुई वर्ष रमाइलो गर्न नपाएका बेलायतका नेपालीहरुमा रमाइलो गर्नुपर्छ भन्ने भावनाका कारण नै धेरै नेपाली कलाकारले बेलायत आउने मौका पाएको बताउँछन् । “महामारीपछि नेपालीहरुमा जीवन केही रहेनछ । जति बाँचिन्छ रमाइलो गरेर बाँच्नुपर्ने रहेछ भन्ने सोचाइ आएको पाइन्छ”, उनले भने ।
अहिलेसम्म बेलायतका लागि भिसा आवेदन गरेका नेपाली कलाकारहरुले बरु कार्यक्रमभन्दा ढिलो भिसा पाएको तर कसैको आवेदन अस्वीकृत भएको आफूलाई थाहा नभएको उनले जानकारी दिए ।
कोभिडअघि ठूल्ठूला संस्थाहरुले मात्र नेपालबाट कलाकार ल्याउने गरेकोमा अहिले स–साना संस्थाहरुले पनि कलाकार ल्याउने आँट गरेको आफूले पाएको उनले बताए । “कोभिड अघि नेपाली नयाँ वर्षमा बेलायतमा दुई÷चार जना कलाकारहरु हुन्थे तर यो साल नेपाली नयाँ वर्षमै करिब एक दर्जन कलाकार बेलायतमा थिए”, उनले भने ।
नेपालबाट बेलायतमा धेरै कलाकार आएपछि कमाइ पनि बाँडिने नै भयो । गायक थापामगर भन्छन्, “पहिले पहिले नेपालबाट आउने सामान्य कलाकारले पनि ४०/५० हजार पाउण्डसम्म लान्थे । अब त्यस्तो होला जस्तो छैन किनकि धेरै कलाकार आएपछि कार्यक्रम पनि बाँडिने भयो । कमाइ पनि बाँडिने नै भयो ।” त्यसैले नेपालबाट आउने कलाकारहरुलाई कोभिडअघिको बेलायतसित तुलना नगर्न र आर्थिक कमाइको ठूलो आश नगर्न पनि उनले आग्रह गरे ।
नेपालमा दैनिक काम पाइरहेका कलाकारहरुलाई बेलायत आएर छ महिना बस्दा घुम्न, रमाइलो गर्न पाए पनि कमाइको हिसाबले भने घाटा हुने उनको धारणा छ । “बेलायतमा आएका कलाकारहरुले सोमबारदेखि शुक्रबारसम्म त खाने, सुत्ने, घुम्ने, रमाइलो गर्ने नै हो । कार्यक्रम हुने शनिबार, आइतबार नै मुख्य हो”, उनले भने ।
लोकदोहोरी कलाकारका लागि विगतमा बेलायतमा निरमाया दोहोरी साँझ थियो । त्यहाँ कलाकारले प्रस्तुति दिने अनि ती कलाकारका बारेमा पहिले थाहा नपाएका संघ संस्थाका नेतृत्वले उनीहरुको कला देख्ने र कार्यक्रममा बोलाउने मौका पाउँथे तर अहिले त्यस्तो दोहोरी नभएकाले त्यस्तो भेटघाट हुने ठाउँको पनि अभाव देखिन्छ । यसले पनि कलाकारको कमाइमा असर पार्ने गायक थापामगर बताउँछन् ।
अहिले बेलायत आइसकेका कलाकारहरुले कार्यक्रमको राम्रो अवसर पाइरहेको तर पछि आउने कलाकारहरुले कम कार्यक्रम पाउने थापामगरको आँकलन छ । तर कलाकारको बेलायत आगमन चाहिँ घट्नेवाला देखिँदैन । गायक थापामगर भन्छन्, “नेपाली नयाँ वर्षमै यति कलाकार बेलायत आइसके अझै समरमा कति कलाकार आइ पुग्लान् ?”
