स्वीन्डनमा महावीर पुनसँग अन्तर्क्रिया 

लण्डन । सामाजिक अभियान्ता एवम् राष्ट्रिय आविष्कार केन्द्र नेपालका संस्थापक अध्यक्ष डा. महावीर पुनसँग बेलायतको स्वीन्डनमा शुक्रबारको दिन गोर्खा नेपाली समाजको आयोजनामा अन्तर्क्रिया गरिएको छ।
युरोपका विभिन्न राष्ट्र भ्रमणको क्रममा बेलायत आइपुगेका पुनसँग राष्ट्रिय आविष्कार केन्द्र नेपालको आविष्कार, अनुसन्धान, काम र केन्द्रको अवधारणाबारे जानकारी गराउन अन्तरक्रिया कार्यक्रमको आयोजना गरिएको हो।
अन्तर्क्रिया कार्यक्रममा पुनले केन्द्रले गरिरहेको विभिन्न कामहरुको बारेमा श्रब्य दृश्यमार्फत जानकारी गराउनुका साथै सहभागीहरुको विभिन्न जिज्ञासाको जवाफसमेत दिएका थिए । सो अवसरमा उहाँले गोर्खा नेपाली समाजले केन्द्रलाई यसअघि गरेको आर्थिक सहयोगप्रति धन्यवाद दिँदै सो आर्थिक सहयोगले प्रतिभा भएका युवाहरुलाई अध्ययन अनुसन्धानमार्फत स्वदेशमै उद्यमी बन्न महत्वपूर्ण भूमिका खलिरहेको जानकारी गराउनु भयो।
यस अघि गोर्खा नेपाली समाजले २४ लाख १८ हजार ६६८ केन्द्रलाई सहयोग गरेको थियो।
मगर संघ यूके, शाखा कमिटी स्विन्डनका अध्यक्ष पूर्ण थापा, किरात राई यायोक्खा बेलायत स्वीन्डनका उपाध्यक्ष श्रीमती कल्पना राईलगायत स्वीन्डनका लब्धप्रतिष्ठित महानुभावहरुको उपस्थितिमा सम्पन्न कार्यक्रमको अध्यक्षता समाजका कार्यवाहक अध्यक्ष भोलाबिक्रम राईले गरेका थिए भने महासचिव लालबहादुर लिम्बुले कार्यक्रम सन्चालन गरेका थिए ।