महामारीमा निशुल्क खाना बाँड्ने नेपाली रेष्टुरेन्ट सन्चालक बने सिटी अफ लण्डनका फ्रि म्यान

लण्डन । कोरोना महामारीका बेला अस्पताल लगायतका अत्यावश्यक सेवा क्षेत्रमा १ लाखभन्दा बढी निशुल्क खाना बाँड्ने लण्डनस्थित एक नेपाली रेष्टुरेन्ट व्यवसायीलाई सिटी अफ लण्डनको फ्रि म्यानको सम्मान दिइएको छ ।

लण्डनको लुइसाममा रहेको पानस गोरखा रेष्टुरेन्टका सन्चालक सुजन कटुवाललाई सिटी अफ लण्डनले सो सम्मान दिएको हो ।

फ्रि म्यान बेलायतमा स्थानिय निकायहरुले दिने सर्वोच्च सम्मान हो ।

करिब एक दशकदेखि व्यवसायरत कटुवाल महामारीपछि रेष्टुरेन्ट बन्द गर्नुपर्छ कि भन्ने सोचमा थिए तर उनकी श्रीमती बन्दनाले समुदाय र अस्पतालका लागि पनि रेस्टुरेन्ट खोल्न सुझाव दिइन् । त्यसपछि कटुवाल दम्पत्तिले अस्पतालका कर्मचारीहरु, कम्युनिटी सेन्टरहरु, घरबारविहीनहरु भएको ठाउँ, केयर होमहरु, खोप केन्द्रमा सहयोग गरिरहेका सैनिकहरुलाई निशुल्क खाना उपलब्ध गराउन थाले । उनीहरुको सो कार्यका बारेमा बेलायतका मूलधारमा मिडियाहरु बीबीसी र आइटिभीले समेत समाचार प्रकाशित गरेका थिए भने सन् २०२० मा क्वीन्स अवार्ड पनि पाइसकेका छन् ।

सिटी अफ लण्डनका प्रवक्ताले कटुवाललाई फ्रि म्यान अफ द सिटीको अवार्ड दिन पाउँदा खुशी लागेको बताएका छन् । यसका लागि कटुवाल बलियो हकदार रहेको उनले बताए । कटुवालको निस्वार्थ कार्य कसरी समुदायले सहकार्य गर्न सक्छ र संकटबाट बाहिर आउन सक्छ भन्ने उदाहरण भएको उनले थपे । कटुवालले कसरी लण्डनलाई राम्रो स्थान बलाउन सकिन्छ भन्नेमा आफूलाई समर्पित गरेको र कटुवालको लगावका साथै सकारात्मक प्रभावको आफूहरुले महसुस गरेको पनि उनले बताए ।

कटुवालले अवार्ड प्राप्त गर्दा हर्ष लागेको र आफ्नो कार्यको सम्मानले आफूलाई विनयशील बनाएको बताए । आफू र श्रीमती समुदायलाई सहयोग गर्नका लागि सक्दो लागि परिरहेको उनले थपे ।

अत्यावश्यक सेवाका क्षेत्रमा अग्रपंक्तिमा रहेर धेरै चापको वावजुद कतिपय अवस्थामा लामो समयसम्म काम गर्नेहरुप्रति आफूमा उच्च श्रद्धा रहेको कटुवालले बताए । उनीहरुलाई सहयोग गर्न पाउँदा र उनीहरुको अनुहारमा थोरै भए पनि हाँसो ल्याउन पाउँदा आफूलाई अपार आनन्द लागेको कटुवालको भनाइ छ ।

फ्रिडम अफ द सिटी अफ लण्डन सन् १२३७ मा शुरु भएको हो । सिटी अफ लण्डन कर्पोरेसनले लण्डनको सार्वजनिक जीवनमा अद्वितीय योगदान दिने वा असाधारण प्रगति गरेका व्यक्तिहरुलाई यो सम्मान दिने गरेको छ ।