एनआरएनएको विवाद समाधानतर्फ, शेष घलेले आह्वान गरेको महाधिवेसन शुरु

काठमाडौँ । गैरआवासीय नेपाली सङ्घ(एनआरएनए) भित्रको विवादका कारण दुई पक्षले अलगअलग महाधिवेशनको घोषणा गरिसकेको अवस्थामा उम्मेदवारहरुबीच सहमति कायम भएको छ भने प्रमुख संरक्षक शेष घलेले बोलाएको महाधिवेसन पनि शुरु भएर नयाँ मोडमा पुगेको छ ।

अध्यक्ष पदका प्रत्यासीहरु कुल आचार्य, डा बद्री केसी र रविना थापाबीच नेतृत्वको विषयमा सहमति भएको आज आयोजित पत्रकार सम्मेलनमा जानकारी दिइएको थियो ।

सहमतिअनुसार एनआरएनएको १० औँ विश्व सम्मेलन यही चैत १० र ११ गते हुनेछ  ।

संस्थाका पूर्वअध्यक्ष र विभिन्न पदाधिकारीहरुको प्रयासमा दुवै पक्षबीच सहमति कायम भएपछि आज संयुक्त पत्रकार सम्मेलन गरी एनआरएनएको विवाद मिलेको र सबै एकताबद्ध भएर अघि बढ्ने अध्यक्षका उम्मेदवारहरुले बताएका छन् ।

तीनै जनाले संस्थालाई एकढिक्का बनाएर लैजाने प्रतिबद्धता जनाउनुभयो । एनआरएनएभित्र सहमतिअनुसार संस्थामा दुई अध्यक्षको व्यवस्था गर्ने समझदारी भएको सो अवसरमा जानकारी दिइयो ।

सो अवसरमा अध्यक्षका उम्मेदवार आचार्यले एनआरएनए हामी सबैको साझा आस्था, विश्वास र अभियान भएकाले यसलाई निरन्तरता दिन सहमतिको विकल्प नभएको बताउँदै संस्थाको इतिहासको १८ वर्षपछिको विषम परिस्थितिको विषयमा गम्भीर छलफल भई एउटा निचोडमा पुगिएको बताउनुभयो ।

अध्यक्षका प्रत्यासी बद्री केसीले सङ्घको एकतालाई कायम राख्न बहुअध्यक्षात्मक प्रणालीबाट सङ्घको नेतृत्व गर्ने सहमति भएको बताउनुभयो । सहमतिलाई कार्यान्वयन गर्न भविष्यमा नजिर नरहने गरी १०औँ महाधिवेशनबाट विधानमा आवश्यक संशोधन गरिने उहाँले बताउनुभयो ।

अध्यक्षका अर्का प्रत्यासी रविना थापाले पनि सहमतिपछि संस्थालाई एक बनाएर अघि बढ्नुपर्ने बताउनुभयो । एनआरएनएमा आगामी अधिवेसनको प्रतिनिधि छनोटमा विवाद हुँदा केही समयदेखि विवाद रहँदै आएको थियो ।
उता, प्रमुख स‌ंरक्षक शेष घलेले आयोजना गरेको एनआरएनए विश्व सम्मेलन शुरु भएको छ । अर्थमन्त्री जनार्दन शर्माले सो सम्मेलनको उद्घाटन गर्नुभयो ।

आयोजक समितिका संयोजक सोनाम लामाको सभापतित्वमा भएको सो अधिवेसनमा एनआरएनए अभियानकर्मीहरुको उपस्थिति थियो । सो सम्मेलनमा विभिन्न शीर्षकहरुमाथि छलफल भइरहेको  छ ।