वार्तामा भाग लिने तीन गोर्खाको नाम चाडै टुंगो लगाउने राजदुत आचार्यको वचन

लण्डन । बेलायतका लागि नेपाली राजदुत ज्ञानचन्द्र आचार्यले गोरखा समस्याका बारेमा नेपाल तथा बेलायतबीच हुने वार्तामा गोरखाहरुका तर्फबाट तीनजना प्रतिनिधि चाँडै टुंग्याउने बताएका छन् ।
गोरखा भूतपूर्व सैनिक संघ (गेसो) केन्द्रीय समितिको प्रतिनिधिमण्डलसितको छलफलमा राजदुत आचार्यले सो कुरा बताएको गेसोका सचिव बुद्धिराज राईद्वारा आज जारी विज्ञप्तिमा उल्लेख छ ।
गेसोका उपसभापति धर्मबहादुर तामाङको नेतृत्वमा गएको गेसोको प्रतिनिधिमण्डलले राजदुत आचार्यलाई स्वागत गर्नुका साथै वार्तामा गोरखाका तर्फबाट सहभागी हुने दुई जना प्रतिनिधिको अझै टुंगो नलागेकोमा ध्यानाकर्षण गराएको थियो । सोको जवाफमा आचार्यले तीन जनाको नामा चाँडै पूरा गर्ने वचन दिएका थिए ।
गोरखाहरुले वार्तामा भाग लिन मेजर रिटायर्ड जुधबहादुर गुरुङको नाममा भने यसअघि नै सहमति जनाएका छन् ।
यस्तै, वार्ताका लागि यसअघिका राजदुतको पालामा निर्देशक समिति गठन गरिएकोमा राजदुत आचार्यले निर्देशक कमिटीलाई निरन्तरता दिइने बताएका थिए ।
वार्ताबाट गोरखाहरुका पक्षमा अधिकतम लाभ लिन निर्देशक कमिटी र वार्ता कमिटीका बीचमा गम्भीर छलफल गरेर मात्र वार्तामा प्रस्तुत हुने पनि आचार्यले बताएका छन् ।
छलफलमा गेसोका उपसभापति तामाङका साथै कोषाध्यक्ष देवीमाया पुन, केन्द्रीय सदस्यहरु नरहाङ राई र मानबहादुर गुरुङ सहभागी थिए भने दुताबासका तर्फबाट राजदुत आचार्य र उपनियोग प्रमुख श्रीमती रोशन खनाल सरिक हुनुहुन्थ्यो ।