मगर संघ युकेले मनायो मगर एकता र शहिद लखन थापा स्मृति दिवस

लण्डन । मगर संघ युकेले चालिसौँ मगर एकता दिवस तथा प्रथम शहिद लखन थापामगरको १४५ ओैँ स्मृति दिवस मनाएको छ ।

शनिबार मगर संघको भवन फार्नब्रोमा केही सदस्यहरुको भौतिक उपस्थिति तथा बाँकी सहभागीको भर्चुअल उपस्थितिबीच संघले सो दिवस मनाएको हो ।

संघका अध्यक्ष सुनिल रानाको अध्यक्षतामा सम्पन्न सो कार्यक्रमको कार्यक्रमको प्रमुख लण्डनस्थित नेपाली दुताबासका उपनियोग प्रमुख श्रीमती रोशन खनाल रहेकी थिइन् । कार्यक्रमको विशेष अतिथिमा एनआरएनए युकेका अध्यक्ष प्रेम गाहामगर, नेपाल आदिवासी जनजाति महासंघ युकेका अध्यक्ष कर्मा पहाडी शेर्पा र समाजसेवी क्याप्टेन रिटायर्ड हरिबहादुर थापामगर रहेका थिए ।

मगर भवनमा उपस्थित अध्यक्षलगायत विशेष अतिथिहरुले नेपाल मगर संघका संस्थापक अध्यक्ष हेमबहादुर पुन, प्रथम शहिद लखन थापामगरको तस्वीरमा माल्यार्पणका साथै पानसमा द्वीप प्रज्वलन गरी कार्यक्रमको शुभारम्भ गरेका थिए । कार्यक्रममा नेपाल तथा बेलायतको राष्ट्रिय गान तथा मगर गान समेत गाइएको थियो ।

महासचिव रुद्र थापामगरले संचालन गरेको कार्यक्रममा स्वागत मन्तब्य कार्यक्रम संयोजक तथा उपाध्यक्ष राम गलामीमगरले गरेका थिए ।

कार्यक्रममा बोल्दै प्रमुख अतिथि खनालले आफू पाल्पामा जन्मे हुर्केकाले मगर जातिका बारेमा परिचित रहेको र नेपालको विकासमा मगर जातिले दिएको योगदानको प्रशंसा गरेकी थिइन् ।

एनआरएनए युकेका अध्यक्ष गाहामगरले मगर संघ युकेकै कारण आफू एनआरएनएमा निर्वाचित हुन सफल भएको र आफूलाई बारम्बार सरसल्लाह दिइरहन आग्रह गरेका थिए ।

नेपाल आदिवासी जनजाति महासंघ युकेका अध्यक्ष शेर्पाले मगर संघ युकेले युवापुस्तालाई प्रशस्त अवसर दिएर अनुकरणीय कार्य गरेको बताए ।

नेपाल मगर संघ काठमाडौँ जिल्ला समितिका पूर्व अध्यक्ष क्याप्टेन हरिबहादुर थापामगरले मगरहरुलाई एक हुन र एक आपसमा मद्दत गर्न अनुरोध गरेका थिए ।

कार्यक्रममा मगर युवा संघका नूतन श्रीशले मगर दिवसका बारेमा, सुजाता थापामगरले नेपाल मगर संघका संस्थापक अध्यक्ष हेमबहादुर पुनमगरको बारेमा र दीपक माइथाने मगरले प्रथम शहिद लखन थापामगरको बारेमा प्रस्तुति वाचन गरेका थिए ।

कार्यक्रमको दोस्रो चरणमा मगर संघ युकेका साँस्कृतिक सचिव सरु रानामगर तथा मिफ्रुरुङ युवा क्लवका समीक्षा राना, ओशिन राना, सरिन थापा र किशोर रानाले आकर्षक ढ‌ंगले मगरहरुको भाषा, वेशभूषा, सँस्कृति तथा नेपालका अरु विभिन्न प्रश्न समेटिएको क्वीज खेलाएका थिए ।

क्वीजमा नरेश खपाङ्गी प्रथम, समीरा थापा दोस्रो र भबहादुर पुन तेस्रो भएका थिए । विजेताहरुलाई अप्रिल ९ मा हुने महाधिवेसनमा पुरस्कार दिइने बताइएको छ ।

अन्त्यमा अध्यक्ष रानामगरले सबैलाई धन्यवाद दिँदै कार्यक्रम विसर्जन गरेका थिए ।

नेपाल मगर संघ (तत्कालिन नेपाल लाङघाली संघ) को पहिलो महाधिवेसन भएको दिन फागुन १५ लाई नेपाल तथा प्रवासमा रहेका मगरहरुले मगर एकता दिवसका रुपमा मनाउँदै आएका छन् । यस्तै, जंगबहादुर राणाको विरुद्धमा जनस्तरमा विद्रोह गरेको अभियोगमा मारिएका लखन थापामगरको स्मृति दिवस हरेक वर्ष फागुन २ गते मनाइने गरेको छ । मगर संघ युकेले दुवै अवसरलाई एकै कार्यक्रम गरी मनाएको हो ।