एनआरएनए इङल्याण्डको भर्चुअल रनफेष्टको तयारी पूरा

मेडिस्टन (यूके) । एनआरएनए इङ्ग्ल्याण्डको आयोजनामा भर्चुअल रनफेस्टमा भाग लिनको लागि फेब्रुअरी ९ सम्मको समय थप गरिएको छ ।

यस बारेमा जानकारी दिन शनिबार (५ फरवरी २०२२) गैरआवासीय नेपाली संघ (एनआरएनए), इङ्ग्ल्याण्ड राज्य समन्वय परिषदले Ps पत्रकार सम्मेलन गर्दै भर्चुअल रनफेष्ट अन्तिम चरणको तयारीमा पुगेको र सहभागी हुनेहरूको संख्या बढिरहेकोले भाग लिनका लागि फेब्रुअरी ९ तारिखसम्म समय थप गरिएको बताइयो ।
प्रेस सम्मेलनमा बोल्दै एनआरएनए इङ्ग्ल्याण्डका अध्यक्ष एलबीजेड गुरूले ‘स्वास्थ्य नै धन’ भन्ने नाराका साथ रनफेष्टले मानसिक र शारीरिक स्वास्थ्यलाई थप मनोबल पुर्याउन सहयोग पुग्ने बताए । ‘महामारीका बेला सबैलाई शारीरिक र मानसिक रूपले तन्दुरुस्त बनाउन हामीले इभेन्ट आयोजना गरेका हौँ र भविष्यमा यसलाई अझ बृहत बनाउने र भौतिक रूपमै एभरेष्ट रन वा अरु कुनै पनि सबै समुदाय वा भाषीहरुलाई पनि सहभागिता गराउन सकिने नाममा निरन्तरता दिने सोँच रहेको छ’, अध्यक्ष गुरूङले भने । उनले यस रनफेस्टमा सहभागिता जनाएर सहयोग गर्न सबैलाई अपिल गरे ।
यसैगरी, एनआरएनए यूकेका अध्यक्ष प्रेम गाहा मगरले इङ्ग्ल्याण्ड राज्य समन्वय परिषदको कार्यले संस्थागत गतिविधिलाई सिर्जनात्मक ढंगले बढाएको र सिंगो समुदायको स्वास्थ्यबारे चेतना जगाउन रनफेष्टले महत्वपूर्ण भूमिका खेल्ने विश्वास व्यक्त गरे । ‘यो रनफेस्टले हामीलाई खेलकुदको माध्यमबाट स्थापति हुन थप सहयोग पुग्ने अध्यक्ष मगरले भने ।
प्रतियोगिताका संयोजक बलराम सुवेदीले स्वास्थ्यबारे जनचेतना प्रवाह गर्न र कोरोना महामारीको समयमा सबैलाई भयबाट मुक्त बनाउन रनफेष्टको आयोजना गरिएको बताए । उनले यूकेबाहेक जापान, यूरोप र अमेरिकाबाट पनि सहभागिता जनाउने गरी उत्साहजनक प्रतिक्रिया आएको बताए ।

उनले नेपाली समुदायबाट सहभागिताका लागि सबैभन्दा धेरै आवेदन दर्ता गरिएको समेत जानकारी दिए । रनफेष्ट ९९ प्रतिशत नेपाली मूलका समुदायबाट अनलाइन रजिष्टर भएको र फेष्टमा करिब पाँच सय जना सहभागी गराउने लक्ष्य रहेको जानकारी दिए ।

रनफेष्ट अन्तर्गत https://nrna-escc.org/sign-up/ मा गएर नाम दर्ता गर्न सकिने छ । दर्ता गरिसकेपछि फेब्रुअरी १५ तारिखसम्म एक पटक पाँच किलोमिटर दौडेर, हिँडेर वा साईकल गरेर रनफेस्ट पूरा गरेको प्रमाण सोही वेभसाइटमा गएर बुझाउनुपर्ने हुन्छ । दौड पूरा गरेका सबै सहभागीहरूलाई प्रमाणपत्र र मेडल प्रदान गरिने छ ।
बेक्स्ली नेपाली समाजबाट करिब ६० जनाले फेब्रुअरी तेस्रो साताभित्र दौडेर ऐक्यबद्धता जनाउन लागेको प्रवक्ता डा विशाल गुरूङले बताए । यसैगरी, विभिन्न नेपाली समाजहरूले समेत प्रत्यक्ष र सामूहिक रूपमा दौडेर रनफेष्टलाई प्रचार गर्दै सहयोग गर्ने तयारी गरिरहेको जानकारी दिए ।
पत्रकार सम्मेलनलाई सहसचिव अहिल्या कुँवरले सञ्चालन गरेका थिए भने प्रवक्ता डा विशाल गुरूङले स्वागत मन्तव्य राखेका थिए ।