लण्डन । रोयल ग्रीनीच नेपाली सोसाइटीका अध्यक्ष जीत रानाभाट बेलायतमा आगामी मे महिनामा हुन गइरहेको स्थानीय निर्वाचनमा काउन्सिलरको उम्मेदवार भएका छन् ।
उनी नेपालीहरुको बाक्लो बसोबास भएको दक्षिण पूर्वी लण्डनको प्लमस्टिड तथा ग्लीनडन वडाबाट लेबर पार्टीका तर्फबाट उम्मेदवार बनेका हुन् ।
यो वडा लण्डनको ग्रीनीच काउन्सिलमा पर्दछ ।
ग्रीनीच लेबर पार्टीको विहीबार भएको बैठकले रानाभाटलाई काउन्सिलरको उम्मेदवार तय गरेको हो ।
साउथ इस्ट लण्डनमा परिवारसहित बसोबास गरिरहेका रानाभाट सन् २००८ मा हाई स्किल भिजामा बेलायत आएका थिए ।
उनी एनआरएन युकेमा २०१७-१९ कार्यकालमा कार्यसमिति सदस्य र १९-२१ मा सचिव पदमा निर्वाचित भएका थिए । उनले सो अवधिमा संस्थाको व्यापार प्रबर्द्धन विभागको संयोजकको जिम्मेवारी उनले सम्हालेका थिए ।
कोरोना संक्रमणका बेला नेपाली समुदायलाई सहयोग गर्न एनआरएन यूकेले चलाएको हेल्पडेस्कमा संयोजकको भूमिका रानाभाटले लिएका थिए । आरजीएनएसको कोभिड सहायता र जनगणना अभियानमा पनि उनी संयोजक थिए । दुवै काममा उनले सकृय भूमिका निर्वाह गरेका थिए । कोभिड महामारीमा गरेको सहयोगको कदर गर्दै रानाभाटलाई बीबीसी रेडियो लन्डनले ‘मेक अ डीफरेन्स हिरो’को रुपमा कदर गरेको थियो ।
आफ्नै व्यवसाय गर्दै आएका रानाभाटले नेपालको पोखरा युनिभर्सिटीबाट एमफिलसम्मको अध्ययन गरेका छन् ।
सामाजिक कार्यमा कृयाशील रानाभाटसित नेप्लिज प्रोफेसनल्स युके , यती नेपाली एशोसिएसन, क्षेत्री समाज युके, पशुपतिनाथ मन्दिर लगायतका संस्थामा काम गरेको अनुभव छ ।
