इङ्ल्याण्डमा अर्को विहीबारदेखि कोभिडसम्बन्धी नियम खुकुलो हुँदै

लण्डन । इङ्ल्याण्डमा अर्को विहीबारदेखि कोभिडसम्बन्धी नियन्त्रणकारी प्रावधानहरु खुकुलो बनाइने भएको छ ।

बेलायतका प्रधानमन्त्री बोरिस जोन्सनले आज बेलायती संसदमा बोल्दै सो घोषणा गरेका हुन् ।

जोन्सनका अनुसार विहीबारदेखि इङल्याण्डमा कोभिड पास अनिवार्य रहने छैन । तर यदि व्यापारिक प्रतिष्ठानहरुले चाहेमा उनीहरुमा निर्णय लिने अधिकार दिइएको छ । यसअघि नाइट क्लवलगायत ठूला इभेन्टहरुमा कोभिड पास भएपछि मात्र प्रवेश दिइन्थ्यो ।

यसैगरी, सार्वजनिक यातायातमा मास्क लगाउनै पर्ने नियम पनि खारेज गरिएको छ । इङल्याण्डका माध्यमिक तहका कक्षाहरुमा विद्यार्थीहरुले मास्क लगाउनै पर्ने नियम पनि हटाइएको छ । यसअघि सार्वजनिक यातायातमा मास्क नलगाएमा जरिवाना गर्ने गरिएकोमा त्यो अब कायम रहने छैन । तर अपरिचितसितको भेटमा, धेरै भीडभाड भएको ठाउँमा, साँघुरो ठाउँमा भने मास्क लगाउन सल्लाह दिइएको छ ।

यस्तै, घरबाटै काम गर्न दिइएको सल्लाह पनि अब अन्त्य गरिएको छ । केयर होमहरुमा यसअघि लगाइएको नियन्त्रण पनि हटाइएको छ र यसबारेमा थप जानकारी दिइने बताइएको छ ।

यद्यपि कोरोना भाइरस टेष्ट गर्दा पोजिटिभ देखिएमा सेल्फ आइसोलेसन गर्नुपर्ने नियम भने कायमै राखिएको छ ।