एनआरएनएको निर्वाचन २८ फेब्रुअरीमा हुने

लण्डन । गत अक्टोबरमा हुनुपर्ने गैरआवासीय नेपाली स‌ंघ (एनआरएनए) अन्तर्राष्ट्रिय समन्वय परिषद्को निर्वाचन फेब्रुअरी २८ मा हुने भएको छ ।

स‌ंघको आज बसेको बैठकले सो निर्णय गरेको प्रवक्ता डीबी क्षेत्रीद्वारा जारी प्रेस विज्ञप्तिमा जनाएको छ ।

अध्यक्ष कुमार पन्तको अध्यक्षतामा बसेको बैठकले संघको आगामी नेतृत्व चयनका लागि निष्पक्ष र पारदर्शी रुपमा निर्वाचन कार्यक्रम अघि बढाउन र महाधिवशेन प्रतिनिधिमा देखिएका असन्तुष्टीहरुलाई सम्बोधन गर्न संघका प्रमुख संरक्षक शेष घलेको संयोजकत्वमा ७ सदस्यीय उच्चस्तरीय समिति गठन गरिएको छ ।

समितिमा संस्थापक अध्यक्ष डा उपेन्द्र महतो, संरक्षकहरु देवमान हिराचन, जीवा लामिछाने, भवन भट्ट, राम प्रताप थापा र वर्तमान अध्यक्ष कुमार पन्त रहनुभएको छ ।

उच्चस्तरीय समितिले संघको विधानअनुरुप २६ जनवरी २०२२ सम्ममा महाधिवेशन प्रतिनिधिहरुको अन्तिम नामावली तयार गरी संघका अध्यक्षमार्फत निर्वाचन समितिसमक्ष पेश गर्नेछ ।

बैठकले दशौँ महाधिवेशनमा पेश हुने महासचिव डा हेमराज शर्माको वार्षिक प्रतिवेदन र कोषाध्यक्ष महेश श्रेष्ठको आर्थिक प्रतिवेदनलाई पारित गरेको छ ।

बैठकले सहमति र सहकार्यमा निर्वाचन कार्यक्रम सञ्चालन गर्नका लागि आवश्यक वातावरण तयार गर्न सहयोग गर्नु हुने संस्थापक अध्यक्ष, प्रमुख संरक्षक, संरक्षकहरु, सल्लाहकारहरु, पदाधिकारीहरु लगायत सम्बन्धित सबैलाई धन्यवाद ज्ञापन गरेको छ । साथै, संघको स्थायित्व नै विश्वभर छरिएर बसेका समस्त गैरआवासीय नेपालीहरुको गौरवको विषय भएको मनन गर्दै हालसम्मका समग्र आपसी मतभेद बिर्सेर निर्वाचनमा आ–आफ्नो स्थानबाट सहयोग, समर्थन र सहभागी भइदिन राष्ट्रिय समन्वय परिषद, उम्मेदवार, मतदाता तथा शुभचिन्तकहरुलाई अनुरोध गरेको छ ।

महाधिवेशनमा मतदान गर्न तथा उम्मेदवार बन्नको लागि अति आवश्यक र अनिवार्य फेस भेरिफिकेसन (सेल्फी रजिष्ट्रेशन) गरिदिनुहुन सबै महाधिवशेन प्रतिनिधिहरुलाई अनुरोध गरिएको छ ।