शुक्रबार, माघ ७ २०७८ | Fri, January 21, 2022
नेपालको समय: ०२:४९ | UK Time: 21:04

बेलायती अर्थतन्त्र कोभिड महामारीपूर्वको अवस्थामा

वीनेपाली
२०७८ माघ १ गते १३:४९

लण्डन । बेलायतको अर्थतन्त्र कोभिड महामारी शुरु हुनुभन्दा अगाडीको अवस्थामा पुगेकाे छ ।

अफिस अफ न्याशनल स्ट्याटिटिक्सले शुक्रबार सार्वजनिक गरेको आँकडाअनुसार सन् २०२१ को नोभेम्बर महिनामा बेलायतको अर्थतन्त्र कोभिड शुरु हुनु अगाडीको अवस्थामा पुगेकाे हो ।

सो तथ्यांकअनुसार नोभेम्बर २०२१ को अर्थतन्त्र सन् २०२०को फेब्रुअरी महिनाको अर्थतन्त्र भन्दा ०.७ प्रतिशतले ठूलो थियो ।

अफिस अफ न्याशनल स्ट्याटिटिक्सका अर्थशास्त्री ग्रान्ट फ्रिज्नरले नोभेम्बर महिनामा बेलायतको सेवा, उत्पादन र निर्माण क्षेत्रकाे योगदानका कारण अर्थतन्त्र प्रक्षेपण गरिएभन्दा छिटो सुधार भएको बताए । यसअघि अर्थशास्त्रीहरुले नोभेम्बरमा ०.४ प्रतिशत मात्र अर्थतन्त्र वृद्धि हुने अनुमान गरे पनि ०.९ प्रतिशत वृद्धि भएको थियो ।

फ्रिज्नरले आर्टिटेक्ट, रिटेल, कुरियर र अकाउण्टिङ क्षेत्रमा सो अवधिमा राम्रो सुधार आएको बताए ।

विश्वको पाँचौँ ठूलो अर्थतन्त्र बेलायतको अर्थतन्त्र अमेरिका लगायतका देशको अर्थतन्त्र कोभिड पूर्वको अवस्थामा पुगिसक्दा पनि तङ्ग्रिन सकेको थिएन । कोरोना महामारीका कारण बेलायतको अर्थतन्त्र  सन् २०२०मा ९ प्रतिशतले खुम्चिएको थियो ।

यद्यपि डिसेम्बरमा फैलिएको ओमिक्रोन भेरियन्ट र त्यसलाई नियन्त्रण गर्न सरकारले लागू गरेको प्लान बीका कारण बेलायतको अर्थतन्त्र डिसेम्बर र जनवरीमा केही खुम्चिने अनुमान गरिएको छ । अफिस अफ न्याशनल स्ट्याटिटिक्सले डिसेम्बरमा ०.२ प्रतिशत भन्दा ज्यादा अर्थतन्त्र नखुम्चने अनुमान गरेको छ ।

चर्को मुद्रास्फिति, ब्याजदरको वृद्धि, उर्जाको मूल्य वृद्धि लगायतका कारणले सन् २०२२ को बेलायतको अर्थतन्त्र आशाजनक नहुने प्रारम्भिक अनुमान पनि गरिन थालेको छ । तथापि युलेर अर्मिस नामक बीमा कम्पनीका आर्थिक अनुसन्धान प्रमुख आना बोअटाले सन् २०२२ मा बेलायतको अर्थतन्त्र २.६ प्रतिशत वृद्धि हुने बताएकी छिन् ।

बेलायतका अर्थमन्त्री ऋषि सुनकले बेलायतको अर्थतन्त्र कोभिडपूर्वको अवस्थामा आउनुलाई बेलायती जनताहरुको साहस र कटिवद्धताको प्रतीक भनेका छन् ।

 

 

प्रतिक्रिया

सम्बन्धित सामाग्री

फेसबुक