पत्रकार महासंघ बेलायतले प्रेस विज्ञप्ति लेखन कार्यशाला गर्दै 

लन्डन । नेपाल पत्रकार महासंघ बेलायत शाखाले बेलायतस्थित नेपाली संघसंस्थाका प्रतिनिधिहरुको लागि  प्रेस विज्ञप्ति लेखन कार्यशाला आयोजना गरेको छ ।

यही शनिबार जनवरी ८ तारिख शनिबारका दिन भर्चुअल ‘जुम’ बाट सो कार्यशाला संचालन हुने शाखाका महासचिव नरेन्द्र बस्नेतले जानकारी दिए । सो कार्यक्रमका संयोजक समेत रहेका बस्नेतका अनुसार कार्यशालामा बेलायतस्थित नेपाली संघसंस्थालाई आमन्त्रण गरिएको छ।

आमन्त्रित संघसंस्थालाई कार्यशालामा आफ्ना अध्यक्ष, सचिव, मिडिया संयोजक लगायतका पदाधिकारीबाट एक वा बढी प्रतिनिधि पठाउन अनुरोध गरिएको छ ।

कार्यशाला बिहान १० देखि मध्याह्न १२ बजेसम्म सञ्चालन हुनेछ ।

कार्यशालामा सहभागी संघसंस्थाका प्रतिनिधिलाई प्रेस रिलिज/ प्रेस नोट कसरी लेख्ने, के के जानकारी राख्ने, के के नराख्ने जस्ता विषयमा जानकारी गराइनेछ । त्यस्तै, मिडियालाई कसरी सम्पर्क गर्ने, आफ्ना गतिविधि वा कार्यक्रमसम्बन्धी सूचना, जानकारी मिडियामा कसरी पठाउने भन्ने जस्ता व्यावहारिक परामर्श पनि दिइनेछ ।

कार्यशालाका मुख्य प्रस्तोता शाखाका निवर्तमान अध्यक्ष एवम् वीनेपालीडटकमका सम्पादक नरेश खपांगीमगर रहनेछन् । व्यावसायिक पत्रकारितामा दुई दशक लामो अनुभव संगालेका खपांगीमगरले नेपालमा रहँदा गोर्खापत्र दैनिकसहितका कयौं प्रतिष्ठित राष्ट्रिय मिडियामा काम गरिसकेका छन् ।

नेपाल पत्रकार महासंघ बेलायत शाखाले बेलायतस्थित नेपाली समुदायसँगको सम्बन्ध र आपसी सहकार्यलाई सुदृढ पार्दै लैजाने लक्ष्यअनुरुप कार्यशाला आयोजना गर्न लागेको अध्यक्ष ध्रुवराज अर्यालले बताए ।

‘बेलायतको नेपाली समुदायको हितलाई केन्द्रमा राखेर काम गर्ने हाम्रो कोसिस हो’, अर्यालले भने, ‘कार्यशालाले मिडियामा हाम्रो समुदायको पहुँच बढाउन र सहज बनाउन सहयोग पुर्‍याउने आशा लिएका छौं ।’

शाखाले कार्यशालामा सहभागिताका लागि बेलायतका सम्पूर्ण  नेपाली संघसंस्थालाई आव्हान गरेको छ । प्राविधिक कारणले कसैलाई निमन्त्रणा नपुगेको भए समेत कार्यक्रममा सहभागी हुन सक्ने जनाइएको छ ।

कार्यक्रममा सहभागी हुने आफ्ना प्रतिनिधिको नाम शुक्रबारभित्रै शाखालाई जानकारी गराउन पनि संस्थाहरुलाई आग्रह गरिएको छ ।

प्रतिक्रिया

सम्बन्धित सामाग्री