कति सैनिक छ बेलायतसित ?

लण्डन । विश्वको शक्ति राष्ट्रहरुमध्ये एक बेलायतसित कति सैनिक शक्ति होला ? धेरैको चासोको विषय बन्न सक्छ । कतिपय मुलुकहरुले सैनिक संख्यालाई सुरक्षाको विषय भनेर सार्वजनिक गर्दैनन् तर बेलायतमा भने नियमितरुपमा सैनिक संख्या सार्वजनिक गर्ने गरिन्छ ।
यसैक्रममा बिहीबार बेलायती रक्षा मन्त्रालयले सार्वजनिक गरेको तथ्यांकअनुसार १ अक्टोवर २०२१ सम्ममा बेलायतसित १ लाख ९८ हजार ९४० सैन्यशक्ति छ । जो गत वर्षको तुलनामा ३ हजार ८ सय ९० जनाले बढी छ । तीमध्ये १ लाख ३७ हजार १३० जना पूर्णकालिन सैनिक छन् भने बाँकी रिजर्भ बलमा ।
गत वर्ष बेलायती सेनामा १७ हजार ७० सैनिक नयाँ भर्ना भएका छन् भने १३ हजार ८५० जना सेवा निवृत्त भएका छन् । यसैगरी, गत वर्ष ३२ हजार ७० जना रिजर्भ बलमा भर्ना भएका छन् ।
रोयल नेभी वा रोयल मरिनमा ४० हजार ६५० जना सैनिक कार्यरत रहेका छन् भने रोयल एयर फोर्समा ३७ हजार ९९० जना सैनिक सेवारत छन् ।
बितेका तीन वर्षमा बेलायती सेनाको सबै ट्रेडमा (स्वयंसेवकबाहेक) सैनिकहरुको संख्या बढ्दो पाइएको छ ।

गोरखाको संख्या बढ्दै
गोरखाहरुको संख्या विगत तीन वर्षमा करिब छ प्रतिशतले बढेको छ । सन् २०१८ को अक्टोबरमा ३ हजार ९० जना गोरखा बेलायती सेनामा कार्यरत थिए भने सन् २०१९ को अक्टोवरमा त्यो संख्या बढेर ३ हजार ३८० पुगेको थियो । सन् २०२० को अक्टोबरमा अरु वृद्धि हुँदै ३ हजार ७४० पुगेको थियो भने सन् २०२१ को अक्टोबरमा सेवारत गोरखाहरुको संख्या बढेर ३ हजार ९६० पुगेको छ । तर यो संख्यामा गोरखा ब्रिगेडबाहेक अरु पल्टनमा कार्यरत नेपाली मूलका सैनिकहरु भने गणना गरिएको छैन ।