अल्डरसट सुन पसल चोरी: प्रहरीद्वारा सर्वसाधारणलाई सूचना दिन अपील

लण्डन । अल्डरसटमा शुक्रबार बिहान नेपाली व्यवसायीहरुद्वारा संचालित सुनका गहना पसलमा भएको चोरीका बारेमा स्थानीय प्रहरीले सर्वसाधारणलाई सूचना दिन अपील गरेको छ ।

ह्याम्पसायर प्रहरीले शुक्रबार बिहान १०:१८ मा एक अपील प्रकाशित गर्दै सो घटनाका बारेमा केही सूचना वा जानकारी भए प्रहरीलाई उपलब्ध गराउन अनुरोध गरेको छ ।

प्रहरीले सो घटनामा ठूलो परिमाणमा सुन चोरी भएको प्रारम्भिक अनुमान गरेको छ । दुवै पसलमा प्रशस्त गहना रहेको प्रहरीको अनुमान छ।

प्रहरीले बिहान करिब ३:२० बजे आफूहरुलाई स्टेसन रोडमा रहेको अनुग्रह ज्वेलर्स र भिक्टोरिया रोडमा रहेको न्यू लक्ष्मी ज्वेलर्समा डकैती भएको भन्दै सूचना आएको बताएको छ ।

दुवै घटनामा प्रयोग भएको सिल्भर रङको ल्याण्डरोभर डिस्कभरी भिक्टोरिया रोडमा छाडिएको अवस्थामा प्रहरीले फेला पारेको छ ।

दुवै घटनास्थलमा अहिले प्रहरीले अनुसन्धान गरिररहेको बताइएको छ ।

प्रहरीले घटना भएको समयमा ती स्थानमा रहेका वा सुनेका देखेका सर्वसाधारणहरुलाई सिसिटिभी फुटेज, डोरबेल, ड्यासक्याम प्रहरीलाई उपलब्ध गराउन अनुरोध गरेको छ । ती सूचनाका लागि १०१ मा फोन गरी ४४२१०४९४५०६ उल्लेख गर्न सकिने छ । यसैगरी क्राइमस्टोपर्सको फोन ०८००५५५१११ मा नाम उल्लेख नगरी जानकारी दिन सकिने छ ।