लण्डन । नेपाल सरकारले गैरआवासीय नेपाली संघ (एनआरएनए) माथि हस्तक्षेप गर्दै अर्को निर्देशनात्मक पत्र जारी गरेको छ ।
परराष्ट्र मन्त्रालयका सहसचिव भरतकुमार रेग्मीद्वारा हस्ताक्षर गरिएको पत्रमा एनआरएनए अन्तर्राष्ट्रिय समन्वय परिषद्लाई कार्यकाल सकिएकाले कुनै कामकारबाही नगर्न भनिएको छ ।
साथै एनआरएनए आइसिसीको निर्वाचन संरक्षक परिषदबाट मात्र दिन निर्देशन दिइएको छ । आइसिसीले केही दिन अघि मात्र डिसेम्बर १५ मा निर्वाचन गर्ने र डिसेम्बर १७ र १८ मा सम्मेलन गर्ने निर्णय गरेको थियो ।
मन्त्रालयले एनआरएनए अधिवेसनका लागि ६५ प्रतिशत प्रतिनिधि पनि नवनिर्वाचित राष्ट्रिय समन्वय परिषदबाट पठाउन निर्देशन दिएको छ ।यसअघि ती प्रतिनिधि तत्कालिन समितिबाट चुनिएका थिए ।
मन्त्रालयले यसअघि पनि भदौ २५ गते र असोज २२ गते एनआरएनए आइसिसीलाई निर्देशन दिएको थियो ।
उता एनआरएनए आइसिसीका प्रवक्ता डिबी क्षेत्रीले मन्त्रालयको निर्देशन मान्न नसकिने प्रतिक्रिया दिए । ‘आइसिसीको वैधानिकता सकिएको भन्ने अनि त्यही आइसिसीले बनाएको संरक्षक परिषद् चाहिँ कसरी बैधानिक हुनसक्छ’ उनले प्रश्न गरे ।
उनले मन्त्रालयलाई एकपटक अनुरोध गर्ने र तत्पश्चात पनि स्थिति उही रहिरहेमा अदालत पनि जाने र पूर्वघोषित कार्यक्रमअनुसार निर्वाचनमा जाने बताए । ‘मन्त्रालयको पटकपटकको हस्तक्षेप संस्थाले मान्न सक्दैन । एकपटक (मन्त्रालयसित) आग्रह गर्छौँ चुनाव जसले जिते पनि पूर्ववत कार्यक्रम अघि बढाउँछौँ ‘ उनले भने ।
