प्रधानमन्त्री जलवायु सम्मेलनमा भाग लिन देउवा बेलायत आउँदै

काठमाडौँ । प्रधानमन्त्री शेरबहादुर देउवाको यही अक्टोवर ३१ देखि नोभेम्बर १२ सम्म बेलायतको ग्लास्गोमा आयोजना हुने जलवायु परिवर्तनसम्बन्धी सम्मेलनमा भाग लिन बेलायत आउने भएका छन् ।

मन्त्रिपरिषदको आज बसेको बैठकले देउवाको नेतृत्वमा ‘वर्ल्ड लिडर समिट’मा सहभागी हुने प्रतिनिधिमण्डलको गठन गर्ने निर्णय गरेको छ ।

देउवाको प्रधानमन्त्री पद सम्हालेपछिको यो पहिलो विदेश भ्रमण हो ।

देउवा विद्यार्थी कालमा लण्डनको लण्डन स्कुल अफ इकोनोमिक्स एण्ड पोलिटिकल साइन्समा अध्ययन गरेका थिए ।

यस्तै बैठकले मन्त्रिपरिषद्को आज बसेको बैठकले साफ च्याम्पियनसीप प्रतियोगितमा उपविजेता भएका नेपाली फुटबल टिमका खेलाडीलाई जनही रु पाँच लाख र प्रशिक्षकलाई रु तीन लाखका दरले प्रोत्साहन रकम उपलब्ध गराउने निर्णय गरेको सञ्चार तथा सूचना प्रविधिमन्त्री एवं सरकारका प्रवक्ता ज्ञानेन्द्रबहादुर कार्कीले जानकारी दिनुभयो ।

यसैगरी बैठकले मोहम्मद जयन्ती (१४९६) का अवसरमा यही कात्तिक २ गते मुस्लिम सुमुदायलाई सार्वजनिक बिदा दिने र आर्थिक कार्यविधि तथा वित्तीय उत्तरदायित्व (पहिलो संंशोधन) नियमावली, २०७८ स्वीकृत गर्ने निर्णय गरेको छ ।

अबुधाबी डाइलगको छैटौँ मन्त्रीस्तरीय परामर्श बैठकमा सहभागी हुन श्रम, रोजगार तथा सामाजिक सुरक्षा मन्त्रीलाई स्वीकृति दिने र लोकसेवा आयोग तथा बढुवा समितिको सिफारिसबमोजिम राजपत्राङ्किंत प्रथम श्रेणीका विभिन्न पदहरुमा नियुक्त गर्ने निर्णय भएको उहाँले बताउनुभयो ।

प्रतिक्रिया

सम्बन्धित सामाग्री