गोरखाको अनसनमा एनआरएनए युकेको ऐक्यवद्धता

तस्वीर शिव भण्डारी

लण्डन । गोरखाहरुको समस्या समाधानका लागि बेलायत तथा नेपाल सरकारबीच तुरुन्त वार्ता हुनु पर्ने माग राखी आमरण अनसनमा बसेका गोरखाहरुप्रति गैरआवासीय नेपाली स‌ंघ युकेले ऐक्यवद्धता जनाएको छ ।

संघका अध्यक्ष प्रेम गाहामगर मंगलबार गोरखाहरुको अनसनस्थलमा पुगी आफ्नो तर्फबाट उहाँहरुको मागलाई सम्बन्धित स्थानमा पुर्याउन सक्दो सहयोग गर्ने बताए । उनले नेपाल सरकार, बेलायत सरकार र एनआरएनए अन्तर्राष्ट्रिय समन्वय समितिलाई पत्राचार गरी गोरखाहरुको समस्याका बारेमा तत्काल कदम चाल्न अनुरोध गरिने जानकारी दिए ।

बेलायतमा मार्गरेट थ्याचरको पालामा आमरण अनसन बसेका अनसनकारीको मृत्यु भएको दुखान्त उदाहरण पेश गर्दै गाहामगरले गोरखाहरुको अनसन त्यस्तो अवस्थामा पुग्न अघि नै बेलायत तथा नेपाल सरकारलाई आवश्यक कदम चाल्न दबाब दिन बेलायतमा रहेका सबै नेपालीहरु एकजुट भई सहयोग गर्नुपर्ने पनि बताए । अनसनलाई नैतिक, भौतिक, आर्थिक सबै किसिमको सहयोग गर्न उनले अपील गरे ।

सो अवसरमा महासचिव खुशी लिम्बु र अन्तर्राष्ट्रिय समन्वय समितिका सदस्य समिर खनाल अनसन स्थल पुगेका थिए ।

पूर्व गोरखाहरु ज्ञानराज राई र धनबहादुर गुरुङ साथै पुष्पा घले राना पाँच दिनदेखि बेलायती प्रधानमन्त्रीको कार्यालयको अघिल्तिर आमरण अनसन बसिरहेका छन् ।

प्रतिक्रिया

सम्बन्धित सामाग्री