लण्डन । एनआरएनए युकेको निर्वाचनमा धाँधली भएको आरोप अध्यक्षका उम्मेदवार रोजिना प्रधान राईले लगाएकी छिन् ।
बुधबार साँझ एक पत्रकार सम्मेलन गर्दै उनले एक हजारभन्दा बढी भोट अस्वाभाविक ढंगले खसेको र ती भोटका बारेमा भोटको जिम्मा दिइएको एजेन्सी च्वाइस भोटिङले समेत प्रश्न उठाएको उनले बताइन् ।
एनआरएनको केन्द्रीय समितिबाट च्वाइस भोटिङले पाएको डाटाबेसबाट इमेल ठेगाना परिवर्तन गरी करिब एक हजार भोट खसालिएको भन्दै च्वाइस भोटिङले मंगलबार निर्वाचन समितिलाई एक पत्र पठाएको थियो । सो पत्रको बारेमा निर्वाचन समितिले के निर्णय गर्यो भन्ने अझै बाहिर आइसकेको छैन । तर अध्यक्षका उम्मेदवार प्रधान राईले ती मत बदर हुनुपर्ने अडान राखेकी छिन् । उनले ती मतहरु बदर नभएमा कानुनी उपचार खोज्ने चेतावनी पनि दिएकी छिन् ।
हेर्नुहोस् उनको प्रेस विज्ञप्ति जस्ताको तस्तै
आदरणीय पत्रकार साथीहरु
सर्वप्रथम छोटो सूचनाका आधारमा पनि यो पत्रकार सम्मेलनमा उपस्थित भइदिनु भएकोमा हार्दिक धन्यवाद ज्ञापन गर्दछु । गैरआवासीय नेपाली संघ (एनआरएनए) यूकेको सोमबार सम्पन्न निर्वाचनको नतिजा सम्वन्धमा बेलायतस्थित नेपाली समुदायले देखाउनु भएको चासोप्रति मेरो ध्यानार्कषण भएको छ । बेलायतस्थित करिब १ लाख ५० हजार भन्दा बढी नेपालीको प्रत्यक्ष भावनासंग जोडिएको यति संवेदनशील विषयमा भएको ढिलासुस्तीले संघको छवीमा समेत प्रत्यक्ष असर पार्ने निश्चित छ । हामीले संघको छवीलाई कुनै पनि हालतमा धमिल्याउन दिनु हुंदैन् । निर्वाचन प्रकृयाको जिम्मेवारी लिएको बेलायतस्थित भेण्डर च्वाइस भोटिङले दिएको शर्त, निर्वाचन नियमावली र संघको विधान पालना गर्दै हामी निर्वाचमा होमिएका थियौं। यसअघि निर्वाचन समितिले दिएको जानकारी र च्वाइस भोटिङको भनाई अनुसार निर्वाचन परिणामको पहिलो ड्राफ्ट आज (बुधवार) सांझ सम्म निर्वाचन समितिमा आइपुग्नु पर्ने थियो । तर, निर्वाचन परिणामलाई उल्टाउने, प्रकृयालाई समेत बिथोल्ने र निर्वाचन समितिलाई विभिन्न प्रभावमा पार्ने उद्देश्यले गैरआवासीय नेपाली संघका केन्द्रीय सल्लाहकारहरु लगायतको टोली हिजैदेखि निर्वाचन कार्यालयमा धर्ना बसेर निर्वाचन समितिलाई समेत घेराबन्दी गर्ने प्रयास गरेको सुन्दा दुःख लागेको छ ।
यसैबीच चुनावी परिणाम सार्वजनिक गर्ने जिम्मेवारी लिएको च्वाइस भोटिङले समेत बुधवार निर्वाचन समितिलाई एक पत्र लेख्दै निर्वाचनमा १ हजार भन्दा बढी अस्वभाविक रुपमा भोट खसेको प्रष्ट पारेको छ । यस्तै च्वाइस भोटिङले ती मतदाताहरुको फोटो परिचयपत्र समेत माग गरेको छ । च्वाइस भोटिङको पछिल्लो पत्रले निर्वाचनमा ठूलो धांधली र अनियमितता भएको संकेत गरेको छ । म आफैं संघको अध्यक्षको उम्मेदवार भएको नाताले त्यस्ता अनियमित कामको घोर निन्दा गर्दछु । निर्वाचनका क्रममा मैले मतदाताबाट प्राप्त गरेको माया, ममताले परिणाम मेरै पक्षमा आउनेमा विश्वस्त छु । तर परिणामलाई जस्तो प्रभाव पारे पनि त्यस्तै गैरकानूनी मत बदर हुनु पर्छ भन्ने मेरो अडान छ । निर्वाचनमा गैरकानूनी रुपमा अस्वभाविक मतहरु तत्काल बदर गर्न आग्रह गर्दछु । गैरकानुनी रुपमा भएका मतहरु बदर नगरि निर्वाचन परिणाम सार्वजनिक गरिए अन्य मतदाताहरु माथि ठूलो अन्याय हुने तर्फ सबैको ध्यानार्कषण गर्दछु । साथै, बेलायती संघको विधान र बेलायती कानून विपरीत कुनै पनि अप्रिय निर्णय भएमा कानूनी उपचार खोज्ने चेतावनी दिन चाहन्छु ।
रोजिना प्रधान राई, अध्यक्ष, प्रत्यासी गैरआवासीय नेपाली संघ यूके ०४ अगष्ट २०२१
