तस्वीर मिलन तमु
लन्डन । बेलायतको नेपाली समुदायमा लोकप्रिय गोर्खा कप फुटबल प्रतियोगिताको तयारी पूरा भएको आयोजक तमुधिं यूकेले जनाएको छ ।
कोभिड महामारीका कारण गत वर्ष गोर्खा कप भएको थिएन तर यसपटक भने कोभिड १९ को तरङ्गलाई छल्दै आगामी शनिबार (२४ जुलाई) पुरानै स्थान क्वीन्स एभेन्यू अल्डरसटमा हुने भएको छ ।
नयाँ भेरियन्टको भाइरसको संक्रमण बेलायतमा फैलँदै गरेको भए पनि स्थानीय रसमोर बरो काउन्सिल र सरोकारवाला सबै निकायसितको परामर्शमा कोभिड १९को खतरालाई न्यूनीकरण गर्दै यस वर्षको गोर्खा कप गर्न लागिएको आज आयोजित पत्रकार सम्मेलनमा आयोजकले बताए ।
तमुधिं यूके अध्यक्ष हितकाजी गुरुङको अध्यक्षतामा भएको सो पत्रकार सम्मेलनमा कार्यक्रम संयोजक क्याप्टेन देव घलेले गोर्खा कपको तयारीबारे विस्तृत जानकारी दिएका थिए । उनले यसपटक मेन तर्फ ३२ र भेट्रान्स क्याटेगोरीमा १० गरी कुल ४२ टिम सहभागी हुने पनि जनाए । प्रतियोगितामा मेन क्याटगोरीको विजेतालाई २५०० पाउण्ड, ट्रफी र सर्टिफिकेट, दोश्रो हुनेलाई १५०० पाउण्ड, ट्रफी र सर्टिफिकेट तथा भेट्रान्सको पहिलो बिजेताले १२०० पाउन्ड र सेकेन्ड हुने टिमले ८०० पाउण्ड पुरस्कार पाउनेछन् । यस्तै ‘म्यान अफ द म्याच’ अनि ‘म्यान अफ दि म्यानेजर’ लाई पनि ट्रफी दिइने छ ।
प्रतियोगिता आयोजना गर्न ३५ हजार पाउण्ड बढी खर्च लाग्ने उक्त इभेन्टमा सुरक्षा, कोभिड प्रोटोकल, शौचालय, पार्किङ आदिको भरपूर व्यवस्था मिलाइएको आयोजकले जनाएका छन् । गोर्खा कपमा फुटबलबाहेक सामूहिक कल्चरल डान्स, लाइभ गायन, प्यारासुट डिस्प्ले, खाना-हस्तकलाका स्टल, पञ्चेबाजा आदि प्रमुख आकर्षण हुने संयोजक घलेले जनाए ।
कार्यक्रममा तमुधिं यूके अध्यक्ष हितकाजी गुरुङले सरकारले पनि कोभिड नियम हटाएकाले गोर्खा कप भव्य हुने आशा व्यक्त गरे । उनले यस इभेन्टलाई तमुधिं यूकेको मात्र नभइ सबैको साझा मानेर कार्यक्रममा सहभागिता जनाइदिन अपिल पनि गरे । पत्रकार सम्मेलनमा वरिष्ठ उपाध्यक्ष हरि गुरुङले स्वागत मन्तव्य दिएका थिए भने मिडिया सेक्रेटरी एसके गुरुङले मिडियाकर्मीको स्वागत तथा परिचय दिए । स्टल कोअर्डिनेटर तथा तमुधिं यूके उपाध्यक्ष तुलाराम गुरुङले स्टल, टेन्ट लगायतबारे अवगत गराए ।
सो अवसरमा प्रतियोगितामा भाग लिने टिमहरुको ‘ड्र’ पनि गरिएको थियो ।
प्रत्यक्ष र भर्चुअल गरिएको उक्त पत्रकार सम्मेलनमा नेपाल पत्रकार महासंघ बेलायतका अध्यक्ष ध्रुवराज अर्याल, निवर्तमान अध्यक्ष नरेश खपांगीमगर, पूर्व अध्यक्ष चिरन शर्मा, बाचस्पति रेग्मी, प्रकाश गुरुङ, नरेन्द्रराज नेम्वाङ लगायतले जिज्ञासा राखेका थिए । करिब ४ देखि ६ हजार दर्शक सहभागी हुने गोर्खा कपको उद्देश्य युवा खेल प्रतिभाहरुलाई अवसर मात्र होइन्, बेलायतवासी नेपालीमाझ भेटघाट हुने र सुःखदुःख साट्ने पनि रहेको छ ।
तमुधिँ युकेले विगत १९ वर्षदेखि यो प्रतियोगिता आयोजना गर्दै आएको छ ।
