लण्डन । इङल्याण्डमा कोरोनाविरुद्ध दुवै डोज खोप लगाएकाहरुलाई पहेँलो सूचीमा रहेका मुलुकहरुबाट फर्कँदा जुलाई १९ देखि आइसोलेसनमा बस्न नपर्ने भएको छ ।
बेलायतका यातायात मन्त्री ग्रान्ट सापले आज बेलायती संसदमा बोल्दै सो घोषणा गरेका हुन् ।
तर यसरी यात्रा गर्ने यात्रुहरुले कोरोना टेष्ट भने गर्नपर्ने उनले स्पष्ट पारेका छन् ।
बेलायतले कोरोना भाइरसको संक्रमणको दर हेरी विभिन्न मुलुकहरुलाई हरियो, पहेँलो र रातो सूची राखेको छ । जसमध्ये हरियोमा बिना आइसोलेसन यात्रा गर्न पाइन्थ्यो भने पहेँलो सूचीमा रहेका मुलुकहरुमा यात्रा गर्दा घरमै आइसोलेसनमा बस्न पर्दथ्यो । नयाँ प्रावधानअनुसार अब पहेँलो सूचीमा रहेका मुलुकहरुबाट इङल्याण्ड आउँदा अब आइसोलेसनमा बस्नपर्ने छैन ।
तर नेपाललगायत रातो सूचीमा रहेका मुलुकहरुबाट इङल्याण्ड आउँदा होटलमा क्वारेन्टीनमा बस्नपर्ने नियम भने यथावतै रहेको मन्त्री सापले बताएका छन् ।
भारत, नेपाल लगायतका मुलुकहरुलाई बेलायतले रातो सूचीमा राखेको छ र त्यसको पुनरावलोकन जुलाई १५ मा हुँदैछ ।
