लन्डन । रेडिङ नेपाली समाज (जी आर एन सी ए) ले नेपालको कोभिडविरुद्ध लडाईंमा साथ दिंदै स्वास्थ्य उपकरण नेपाल पठाएको छ ।
समाजले १० लिटर क्षमताको ५ वटा अक्सिजन कन्सन्ट्रेटर नेपाल पठाएको हो ।
समाजका अध्यक्ष टेक गुरुङका अनुसार नवलपरासी डाँडासुस्ता पूर्वस्थित मध्यविन्दु जिल्ला अस्पताललाई ती कन्सनट्रेटरहरु हस्तान्तरण गरिसकेको छ । नेपालमा रहेका स्वयंसेवक तथा संयोजक डा. पुष्पमणी खरालको संयोजनमा गत १४ जुनमा अस्पताललाई उपकरण दिइएको हो ।
जीआरएनसीएले कोभिड १९ महामारीका बेला महावीर पुनको च्यारिटी संस्था राष्ट्रिय आविष्कार केन्द्रलाई तीन लाख रुपैयां सहयोग गरेको थियो ।
सन् २००१ मा स्थापित उक्त संस्था सन् २००८ मा च्यारिटी कमिसनमा दर्ता भएपछि यसले सामाजिक कार्यलाई तीव्रता दिइरहेको छ ।
समाजका ५५ स्वयंसेवकहरुको टिमले रेडिङ र हवीट्ली पिसिएन सेन्टरमा १८ हप्ता भन्दा बढी स्वयंसेवा गरेपछि ‘पिपुल्स् अवार्ड’ समेत पाएको थियो ।
समाजका कार्यवाहक महासचिव मणी सुवेदीमार्फत स्वयंसेवा भएको थियो ।
