इलाम समाज बेलायतले इलाममा २० थान कन्सेन्ट्रेटर र १०० थान अक्सिमिटर पठाउने

लण्डन । इलाम जिल्लाको कोरोना पीडितहरुको उपचार र नियन्त्रणका निम्ती इलाम समाज बेलायतले तत्काल १४ लाख पचास हजार बराबरको स्वास्थ्य सामग्री सहयोग गर्ने भएको छ ।

समाजकी अध्यक्ष प्रमिला लाबुङ राईले सो जानकारी दिनुभएको हो । उहाँको अनुसार इलाम जिल्लाका ४ वटा नगरपालिका र ६ वटा गाउँपालिकाको निम्ती प्रत्येकलाई दुई/ दुई थान अक्सिजन कन्सन्ट्रेटर र दस/ दस थान अक्सिमिटर प्रदान गरिने छ । जसको निम्ती जम्मा २० थान अक्सिजन कन्सन्ट्रेटर र १०० थान अक्सिमिटर बेलायतबाटै पठाइदैछ । ती सामग्रीहरु बेलायतका निम्ती नेपाली राजदुतावासको पहलमा बेलायतबाट नेपालसम्म पुर्याइनेछ भने काठमाण्डौबाट इलामसम्म पुर्याई सम्बन्धित नगर तथा गाउँपालिकालाई वितरण गर्नको निम्ती सुर्योदय नगरपालिकाका मेयर रणबहादुर राईले जिम्मेवारी वहन गर्नु हुने छ । जसको निम्ती सम्पूर्ण सामाग्री र आवश्यक कागजपत्रहरु तयार भइसकेको छ र ती सामाग्रीहरु यथासक्य नेपाल प्रस्थान हुने पनि अध्यक्ष राईले जानकारी दिनु भयो ।

सन् २००९ मा गठित इलाम समाज बेलायतले देशमा भैपरी आएका हरेक विपत्तिलगायत गम्भिर अवस्थाका विमारीहरुको उपचारार्थ सहयोग पुर्याउँदै आएको छ । जसमा उल्लेखनीय रुपमा प्रत्येक गाविसहरुको निम्ती स्ट्रेचर वितरण, इलामको गोदकस्थित वृद्धाश्रमको निम्ती अत्यावश्यक सामाग्रीहरु, महाभुकम्पको समयमा आर्थिक सहयोग, जिल्लाका विभिन्न स्थानहरुमा भएका आगलागीमा परेका पीडितहरुको निम्ती आर्थिक र भौतिक सहयोग, जिल्लाव्यापी फुटबल प्रतियोगिताको निम्ती आर्थिक सहयोग जस्ता कार्यहरु छन् । इलामलाई पर्यटकीय स्थलको रुपमा विश्वसामु चिनारी दिलाउने हेतुले “इलाम हाम्रो पहिचान” नामक इलाम जिल्लाका विभिन्न धार्मिक, सांस्कृतिक, प्राकृतिक स्थल र सम्पदा अनि विषेश व्यक्तित्वहरुलाई समेटेर वृत्तचित्र निर्माण पनि गरेको छ । बेलायतमा बसोबास गरिआएका इलामेहरुको ऐक्यवद्धताको प्रतीक मानिने यो संस्था विशुद्ध सामाजिक संस्था हो सोही अनुरुप सामाजिक कार्यहरुमा अग्रसरतापूर्वक संस्थाका सदस्यहरु मात्रै नभएर सम्पूर्ण बेलायतबासी इलामेहरुले हरेक सुखदुखमा आर्थिक, भौतिक र मानसिक रुपले यस्ता सत्कार्यमा हातेमालो गर्ने गरेका छन् । यो पटक पनि सदस्यहरुकै आर्थिक सहयोग संकलनबाट कार्य सफलतामा अग्रसर भइरहेकोमा अध्यक्ष राईले खुशी साथै बेलायतवासी सम्पूर्ण इलामेहरुप्रति हार्दिक आभार व्यक्त गरेकी छिन् र आगामी दिनहरुमा पनि अझै सशक्त रुपले ऐक्यबद्ध रही अगाडी बढ्ने कुरोमा आफू विश्वस्त रहेकी बताएकी छिन् ।