लण्डन। गैरआवासीय नेपाली संघ (एनआरएनए) यूकेको उपाध्यक्ष पदमा युवा अभियन्ता राजन खकुरालले उम्मेदवारी दिने भएका छन । आगामी जुलाई ३१ मा हुन लागेको एनआरएनए यूके निर्वाचनमा खकुरालले उपाध्यक्ष पदमा उम्मेदवारी दिने भएका हुन् । एनआरएनए अभियानमा जोडिएका खकुरालले यसपटक संस्था भित्रै वसेर काम गर्न लागेको बताए । ‘यो अभियानमा सबैको साथ र हौसला अपेक्षा राखेको छु’, उनले भने ।
एनआरएनए यूके सल्लाहकार रहेका खकुरालले पुर्व अध्यक्ष योगकुमार फगामी नेतृत्वको कार्यसमितिमा सदस्यका रुपमा काम गरेका थिए । उपाध्यक्ष उम्मेदवारको रुपमा अघि बढेका खकुरालले एनआरएनए जस्तो प्लेटफर्मलाई नेपाली समुदायहरुको हितमा प्रयोग गर्ने अठोट गरेका छन । एनआरएनए आइसीसीमा कोष परिचालन विभागमा सचिवका रुपमा काम गरिरहेका छन् ।
खकुरालले गत अप्रिल २०२० मा धादिङबेसीस्थित जिल्ला अस्पताललाई आइसीसीमार्फत् करिब ४ लाख बराबरको स्वास्थ्य सुरक्षा सामग्री सहयोग प्रदान गर्ने काममा सकृय भुमिका खेलेका थिए । अन्तरराष्ट्रिय धादिङ समाजका प्रवक्ता समेत रहेका खकुराल बुद्ध फाउन्डेसन यूकेमा कोषाध्यक्ष र नेप्लिज् युथ एशोसिएसन यूकेमा उपाध्यक्ष छन् ।
सन् २०१५ मा ब्लड क्यान्सरपीडित हेमन्तकुमारी थापालाई साढे दुई लाख उपचार खर्च जुटाइदिएका उनले सन् २०१५ मा महाभूकम्पको बेला बेलायतबाट डेढ लाख सहयोग पठाउन सहसंयोजकको भूमिका खेलेका थिए । खकुरालले सन् २०१६ स्पाइनल कर्ड इन्जुरीको उपचारका लागि रमेश मिजारलाई डेढ लाख सहयोग जुटाउने कार्यको पनि संयोजन गरेका थिए ।
बेलायतस्थित लण्डनको विश्वप्रसिद्ध लर्डस् रंगशालामा नेपाल र एमसीसीबीच भएको ऐतिहासिक क्रिकेट प्रतियोगितामा खकुरालले टिकेटिङ कोअर्डिनेटिङको भूमिका निर्वाह गरेका थिए ।
धादिङ घर भएका खकुराल २०१० मा बेलायत आउनुअघि काठमाडौं विश्वविधालयबाट ‘जेनेरल मेडिसिन’ पूरा गरेका थिए । अहिले उनी बेलायतको फार्मेसी तथा हेल्थ एन्ड ब्यूटी रिटेलर कम्पनी ’बुट्स’ मा फार्मेसी असिस्टेन्ट म्यानेजरका रुपमा कार्यरत छन् । आफ्नो पेशा, समाजसेवाका अलावा उनी विभिन्न व्यापार-व्यवसायमा पनि संलग्न छन् ।
