लण्डन । हरेक वर्ष लण्डनको केन्द्र भाग ट्राफालगर स्क्वायरमा बुद्धजयन्ती मनाउँदै आएको बुद्ध फाउण्डेसन युकेले कोरोना भाइरसका कारण यसवर्ष भर्चुअल रुपमा बुद्धजयन्ती मनाउने भएको छ ।
फाउण्डेसनले गत वर्ष पनि कोरोनाका कारण बन्दाबन्दी भएपछि ट्राफालगर स्क्वायर लण्डनमा कार्यक्रम गर्न सकेको थिएन ।
फाउण्डेसनले अन्तर्रास्ट्रिय स्तरमा नेपाली दुताबास बेलायतको समेत सहभागितामा बुद्धजयन्ती मनाउँदै आएको थियो ।
फाउण्डेसनले २५६५ औं बुद्धजयन्तीको अवसरमा कोरोनाको माहामारीबाट सम्पूर्ण मानव जगतले मुक्ति र विजय प्राप्त गरोस् भन्ने शुभकामना ब्यक्त गरेको छ । संस्थाले गरिआएको कार्यक्रमहरु कोभिड १९ साम्य भएपछि पुन: सुचारु गरिने जानकारी दिएको छ ।
यसपटक हामीले विश्व शान्तिको कामना गर्दै भर्चुअल माध्यमबाट बुद्ध जयन्ती २०२१ को शुभकामना ब्यक्त गर्ने कार्यक्रम आयोजना गरेको फाउण्डेसनले जनाएको छ । बेलायतका लागि नेपाली राजदुत लोकदर्शन रेग्मीको प्रमुख आतिथ्यमा आगामी आईतबार ३० मे २०२१ दिनको ११ बजे सो कार्यक्रम आयोजना गरिएको छ ।
