पत्रकार महासंघ युके शाखाको अधिवेसनका लागि वरिष्ठ पत्रकार योगी केन्द्रीय प्रतिनिधि

लन्डन । नेपाल पत्रकार महासंघ बेलायत शाखाको यही जुन १३ मा हुने पाँचाैँ अधिवेसनका लागि वरिष्ठ पत्रकार भगिरथ योगीलाई केन्द्रीय प्रतिनिधि तोकिएको छ ।

महासंघ केन्द्रीय समितिले बुधबार योगीलाई केन्द्रीय प्रतिनिधि मनोनयन गरेको हो ।

सो लगत्तै योगीले शाखामा देखिएका विवाद अन्त्य गरी सर्वसम्मतिमा नयाँ कार्यसमिति चयनका लागि पहल सुरु गरेको बताएका छन् ।

शाखाको ९ मे २०२१ मा सम्पन्न पूर्ण कार्यसमितिको बैठकले भर्चुअल रुपमा १३ जुनमा पाँचौ अधिवेशन गर्ने निर्णय गरेको थियो । साथै नयाँ कार्यसमिति चयनका लागि रमेश साराङकोटीको अध्यक्षतामा निर्वाचन समिति गठन गरेको थियो । निर्वाचन समितिले नियमावली प्रकाशन गरेपछि शाखाका महासचिव सन्जयभक्त कँडेलले  उक्त नियमावली कार्यसमितिको बैठक विपरीत भएको भन्दै विज्ञप्ति निकाले पछि विवाद देखिएको थियो ।

‘महासंघ बेलायत शाखालाई एकतावद्ध गरी सहमतिमा नयाँ कार्यसमिति गठन गर्न नेपाल पत्रकार महासंघको निर्देशनअनुसार महासंघ युके अध्यक्ष नरेश खपांगी मगरलगायतका सबै पक्षसँग वार्ता गरी सहमतिमा पुग्ने विश्वास छ,’ केन्द्रीय प्रतिनिधि योगीले भने । “सदस्यता शुद्धीकरण कार्यान्वयन समितिको संयोजकको रुपमा काम गर्न साथीहरुले जसरी सहयोग गर्नु भएको थियो, अधिवेशनको प्रक्रिया पनि पारदर्शी र सर्वसम्मत ढंगले संचालन गर्न सबै साथीहरुको साथ र सहयोग प्राप्त हुने मैले विश्वास लिएको छु,” उनले भने।