लण्डन । नेपालबाट दुई साताअघि युके आई सेल्फ आइसोलेसनमा बस्दाबस्दै ढलेका घाकबहादुर गुरुङको आज निधन भएको छ ।
बेलायती सेनाका पूर्व कर्पोरल गुरुङको ७६ वर्षको उमेरमा आज बिहान ११:२८ बजे युकेको ननिटनस्थित जर्ज इलियट अस्पतालमा निधन भएको स्थानीय ब्रिट्रिश गोरखा भेट्रान्स एसोसिएन युकेका महासचिव भीम सारुले जानकारी दिए ।
पुर्ख्यौली घर रुपा गाउँपालिका-७, साक्लुङ कास्की भएका गुरुङ श्रीमती र कान्छी छोरीका साथ ननिटनमा बस्दै आएका थिए ।
उनी नोभेम्बर ७ मा मात्र नेपालबाट आएका थिए । युके आएपछि उनी बेलायत सरकारको नियमपालना गर्दै १४ दिने सेल्फ आइसोलेसनमा बस्दै थिए । सोही सिलसिलामा नोभेम्बर १४ का दिन शौचालयमा ढलेपछि उनलाई अस्पताल लगिएको थियो ।
अस्पतालमा उनमा अक्सिजनको मात्राको कमी भएको कारण श्वासप्रश्वासमा समस्या देखिएको थियो । उनमा कोभिड १९ को संक्रमणसमेत भेटिएको अस्पतालले जनाएको छ । तर नेपालमा युके उडान हुनुपूर्व लिइएको कोभिड १९ जाँचमा उनमा कोरोना भाइरसको संक्रमण देखिएको थिएन ।
आर्मी नम्बर २११५४४४८ का उनी सन् २०१३ देखि ननिटनमा बस्दै आएका थिए ।
पारिवारिक स्रोतका अनुसार उनमा बाथको समस्याबाहेक अन्य स्वास्थ्य समस्या थिएन ।
उनको एक छोरी र चार छोरा नेपालमै छन् ।
