तीन किसिमका कोरोना खोपमा के के फरक र समानता छन् ?

प्रभावकारिता

फाइजरको खोपको प्रभावकारिता शुरुमा ९० प्रतिशत भनिएको थियो तर एक सातापछि फेरि सार्वजनिक गरिएको अलि विस्तृत विश्लेषणमा करिब ९५ प्रतिशत प्रभावकारी हुने बताइएको छ । यो प्रभावकारिता खोप दिइएको २८ दिनको अवधिमा देखिएको नतीजाका आधारमा विश्लेषण गरिएको हो ।

उता मोडनाको प्रभावकारिता भने ९४.५ प्रतिशत भनिएको छ । वयस्क र वृद्धावस्थाका मानिसमा सो खोपले उत्तिकै प्रभावकारी काम गर्ने परीक्षणमा देखिएको छ ।

अक्सफोर्डको खोपको प्रभावकारिता भने दुवै डोज दिएपछि ६२ प्रतिशत मात्र देखिएको छ । तर पहिलो डोज पछि भने ९० प्रतिशतसम्म प्रभावकारी रहेको तथ्यांकले देखाएको छ ।

अहिले सार्वजनिक सबै तथ्यांकहरु अन्तरिम मात्र रहेको र परीक्षण चलिरहेकाले अन्तिम नतीजा फेरबदल हुनसक्नेछ ।

भण्डारण

प्रभावकारिताको शुरुवाती नतीजामा अगाडी देखिएको फाइजरको खोप भन्डारण र ओसारपसारमा भने चुनौतीपूर्ण देखिएको छ । फाइजरको खोप माइनस ७० डिग्री सेन्टीग्रेटमा भन्डारण तथा ‌‌ओसारपसार गर्नपर्ने बताइएको छ । खोप लगाउनु अघि यसलाई अर्को घोलसित मिसाउनु पर्ने पनि हुन्छ । फाइजरले खोप राख्नका लागि अलग्गै प्याक बनाएको र विशेष फ्रिज बिना पनि १० दिनसम्म सो प्याकमा राख्न सकिने छ ।

उता मोडना खोप भने भन्डारन र ओसारपसारमा फाइजरको खोपभन्दा सरल छ । मोडनाको खोप ३० दिनसम्म घरायसी फ्रिजमा राख्न सकिने र घरको तापक्रममा १२ घन्टासम्म राख्न सकिने छ । माइनस २० डिग्री सेन्टीग्रेट तापक्रममा ६ महिनासम्म यो खोप राख्न सकिने बताइएको छ । मोडनाको खोप लगाउनु पूर्व कुनै रसायनसँग मिसाउनुपर्ने छैन ।

भण्डारन र ओसारपसारमा सबैभन्दा सजिलो भने अक्सफोर्डको खोप रहेको छ । अरु खोप जस्तै फ्रिजयुक्त सवारीसाधनमा लगेर खोप केन्द्रमा पुर्याई यो खोप दिन सकिने छ । यो खोपलाई सीधा घामको किरणबाट बचाउनुपर्ने र २ देखि ८ डिग्री सेन्टिग्रेटमा राख्दा हुन्छ ।

मूल्य

बेलायतमा भने राष्ट्रिय स्वास्थ्य सेवा (एनएचएस) ले सबै खोपहरु खोप निशुल्क उपलब्ध गराउने छ । तर बाँकी स्थान जहाँ खोप किन्न पर्ने हुन्छ त्यस्ता स्थानका लागि मोडनाको मूल्य प्रति डोज २८ पाउण्ड तोकिएको छ । फाइजरको खोपको मूल्य १५ पाउण्ड तोकिएको छ । मोडनाको खोपमा एमआरएनएको डोज धेरै भएका कारण पनि महंगो परेको हो ।