बेलायतले अर्डर गर्यो ५० लाख डोज मोडेनाको कोरोनाविरुद्ध खोप

लण्डन । बेलायतले मोडेनाको कोरोनाविरुद्धको खोपको ५० लाख डोज अर्डर गरेको छ ।

स्वास्थ्य मन्त्री म्याट हानककले सोमबार पत्रकार सम्मेलनमा सो जानकारी दिएका हुन् । उनले आगामी वसन्त ऋतुमा सो अर्डर आइपुग्ने आशा व्यक्त गरे ।

सोमबार सार्वजनिक मोडेनाको कोरोना विरुद्ध खोपको प्रभावकारिता बारेको प्रारम्भिक रिपोर्टमा सो खोप कोरोना भाइरसबाट मानिसहरुलाई बचाउन करिब ९५ प्रतिशत सफल हुने बताइएको थियो ।

बेलायतले विभिन्न ६ वटा कम्पनीहरुले विकसित गरिरहेका करिब ३५ करोड डोज कोरोना भाइरसविरुद्धको खोप अर्डर गरे पनि मोडेनाको भने गरेको थिएन । सोमबार मात्र मोडेनासित ५० लाख डोजको अर्डर गरिएको हो ।

मोडेनाको खोप भने फाइजरको खोपभन्दा ढिलो मात्र बेलायतले पाउने छ  किनकी बेलायतले मोडेनाको खोपको प्रिअर्डर गरेको थिएन । मोडेनाभन्दा अघि नै अरु खोपहरु बेलायतमा आउनेमा हानककले विश्वास व्यक्त गरेका छन् । बेलायतको अक्सफोर्ड विश्वविद्यालयले विकसित गरिरहेको खोपको रिपोर्ट अर्को साता आउने अपेक्षा गरिएको छ ।