इङल्याण्ड र वेल्समा एक वर्षमा ६ हजार प्रहरी थपिए

लण्डन । बेलायत सरकारको इङल्याण्ड र वेल्समा तीन वर्षमा २० हजार प्रहरी थप गर्ने योजनाको पहिलो वर्षमा उत्साहजनक प्रगति देखिएको छ ।

बेलायतको गृह मन्त्रालयका अनुसार गत एक वर्षमा ५ हजार ८२४ जना नयाँ प्रहरी थपिएका छन् ।

मन्त्रालयले सरकारको योजना गरेको समयभन्दा अगाडी नै लक्षीत प्रहरी भर्ती पूरा हुने विश्वास गरेको छ । २०२१ को मार्चसम्ममा थप ६ हजार प्रहरी भर्ना हुने मन्त्रालयले बताएको छ ।

नयाँ प्रहरीहरु अपराध नियन्त्रण गर्न र कोरोना नियन्त्रणका लागि सरकारले जारी गरेको नियम कार्यान्वयन गर्न सक्रिय रहेको बताइएको छ । मन्त्रालयले अपराधको संख्यामा कमी आएको दाबी गरेको छ ।

गृह मन्त्री प्रीति पटेलले एक वर्षभित्रैमा ६ हजार जना नयाँ प्रहरी थप्न सफल भएकोमा खुशी व्यक्त गरेकी छिन् ।

तथ्यांकअनुसार इङल्याण्ड र वेल्सका विभिन्न ४३ वटा प्रहरी युनिटमा नोभेम्बर २०१९ देखि डिसेम्बर २०२० सम्ममा १२ हजार ६७५ प्रहरी थपिएका छन् । जसमध्ये ५ हजार ८२४ जना सरकारको योजनाअनुसार भर्ती भएका हुन् ।

अहिले इङल्याण्ड र वेल्समा १ लाख ३४ हजार ८८५ जना प्रहरी कार्यरत छन् ।

राष्ट्रिय प्रहरी प्रमुख परिषद्का अध्यक्ष मार्टिन हेविटले थप प्रहरी अधिकृतहरु थपिनु स्वागतयोग्य भएको बताए । तर प्रहरीको माग पूरा गर्न अझ धेरै गर्न बाँकी रहेको उनको टिप्पणी छ ।

प्रहरी कलेजका प्रमुख कार्यकारी अधिकृत माइक कनिङघमले असजिलो समयमा पनि नयाँ अधिकृतहरु भर्ती गर्नु सकारात्मक रहेको बताए ।

नयाँ भर्ती गरिएका अधिकृतहरुमा अफ्रिकी, एसिएन र जातीय अल्पसंख्यकको संख्या उत्साहजनक रहेको बताइएको छ ।

तथ्यांकअनुसार नयाँ थपिएकामध्ये ६२९ जना अफ्रिकी, एसिएन र जातीय अल्पसंख्यकका प्रहरी अधिकृत छन् । जुन १०.७ प्रतिशत हिस्सा हो । यससँगै प्रहरीभित्र अफ्रिकी, एसिएन र जातीय अल्पसंख्यकका प्रहरी अधिकृतको संख्या ९ हजार ८४२ पुगेको छ ।

 

प्रतिक्रिया

सम्बन्धित सामाग्री