लण्डन । कोरोना भाइरसको संक्रमण फैलँदै गएपछि युरोपियन मुलुकहरुमा लकडाउन शुरु भएको छ ।
फ्रान्सका राष्ट्रपति इम्यानुयल म्याक्रोले बुधबार टेलिभिजनबाट सम्बोधन गर्दै फ्रान्समा राष्ट्रव्यापी लकडाउन गर्ने घोषणा गरेका छन् । उनले शुक्रबारदेखि लकडाउन लागू हुने र अत्यावश्यक कार्य र स्वास्थ्यसम्बन्धी काममा मात्र घरबाट बाहिर निस्कन पाइने बताएका छन् ।
उनले फ्रान्समा कोरोना संक्रमणको दोस्रो लहर आउन लागेको र दोस्रो लहर पहिलोभन्दा खतरनाक हुने बताएका छन् ।
उता जर्मनीमा पनि आउने सोमबारदेखि राष्ट्रव्यापी लकडाउन शुरु गरिएको छ । तर जर्मनीको लकडाउन फ्रान्सको जस्तो कडा भने छैन । जर्मनीमा रेस्टुराँ, बार, जिम, थियटरहरु बन्द गरिने बताइएको छ ।
फ्रान्सका राष्ट्रपति म्याक्रोले नयाँ नियमअनुसार घरबाट बाहिर निस्कनु पर्दा फाराम भर्नुपर्ने र घरबाट बाहिरिनुको चित्तबुझ्दो कारण हुनुपर्ने बताएका छन् । यससँगै सबै किसिमका जमघटहरु निषेध गरिएका छन् । तर सार्वजनिक सेवा लगायत कलकारखानाहरु भने सुचारु रहने उनले प्रष्ट पारेका छन् ।
उता जर्मनीमा भने नोभेम्बर २ देखि नोभेम्बर ३० सम्म लकडाउन गर्न चान्सलर एंगेला मर्केल र १६ वटा प्रान्तका प्रधानमन्त्रीहरु सहमत भएका छन् । लकडाउनमा विद्यालयहरु भने खुला रहने छन् । दुई घरका १० जनासम्म मात्र भेटघाट गर्न दिइने छ भने पर्यटकहरुलाई निषेध गरिएको छ ।
उता स्पेनमा भने २५ अक्टोबरदेखि सरकारले राष्ट्रिय संकटको घोषणा गरेको छ । स्पेनमा क्यानरी आइल्याण्डबाहेक अन्य सबै भागमा राति ११ बजेदेखि बिहान ६ बजेसम्म कर्फ्यू लगाइएको छ ।
इटलीमा रेस्टुरेन्ट, बारहरु बेलुकी ६ बजे नै बन्द गर्नपर्ने नियम लगाइएको छ । जिम, पौडी पोखरी, थियटर र सिनेमाहरु बन्द गरिएका छन् भने विवाह, अन्त्येष्ठी जस्ता समारोह पनि निषेध गरिएको छ ।
फ्रान्स र जर्मनीभन्दा बढी मृत्यु संख्या भएको बेलायतमा भने अहिलेसम्म राष्ट्रव्यापी लकडाउन लगाउने कुरालाई सरकारले इन्कार गर्दै आएको छ । तर युकेभित्रकै उत्तरी आयरल्याण्ड र वेल्समा भने राष्ट्रव्यापी लकडाउन लागू भैसकेको छ ।
