लण्डन । कोरोना भाइरसको महामारी चर्किएकै बेला बेलायतमा ठगहरुको सक्रियता पनि उत्तिकै देखिएको छ ।
सरकारले कोरोना भाइरस नियन्त्रणका लागि कोभिड मार्शल नियुक्त गरेसँगै ठगहरुले नक्कली कोभिड मार्शल र स्वास्थ्य कार्यकर्ताको वेश धारण गरेर मानिसहरुको घरघरमा पुग्ने प्रयास गरिररहेको पाइएको छ ।
चार्टर्ड ट्रेडिङ स्ट्याण्डर्ड इन्स्टिच्यूट (सीटीएसआइ) का अनुसार कोभिड मार्शलहरुलाई सामाजिक दुरी कायम गराउने, जरिवाना गर्ने, निजी घरमा प्रवेश गर्ने अधिकार हुँदैन ।
उनका अनुसार ठगी गर्ने तरिकाहरु धेरै किसिमका छन् । कसैले फ्लुको खोप लगाइदिने बहानामा घरभित्र पस्न खोजेको पनि पाइएको उनको भनाइ छ । उनले सर्वसाधारणलाई यस्ता कुराहरु एकआपसमा फैलाउन र मानिसहरुलाई ठगिनबाट जोगिन अपील गरेकी छिन् ।
बेडफोर्डसायर प्रहरीले सेप्टेम्बर महिनामा दुई जना मानिसहरुले नक्कली कोभिड मार्शल बनेको पाइएको बारेमा अनुसन्धान गरिरहेको बताएको थियो । ती नक्कली कोभिड मार्शलहरुले आफूहरुलाई प्रहरीले कोरोना सम्बन्धी निर्देशनहरु पालना भए नभएको जाँच गर्न पठाएको भन्दै घरभित्र पस्न खोजेका थिए । उनीहरुले घरभित्र पस्न नदिएमा जरिवाना गर्ने धम्की पनि दिएका थिए ।
प्रहरीका अनुसार घरधनीले ती कोभिड मार्शल भनाउँदा व्यक्तिहरुलाई परिचय पत्र देखाउन आग्रह गरेका थिए । तर उनीहरुले परिचय पत्र देखाउन सकेनन् । घरधनीले प्रवेश नदिए पछि उनीहरु घरबाट फर्किएका थिए ।
बेडफोर्डसायर प्रहरीका लेस्ली जोन्सनले सो घटनाबाट घरधनी भयभीत भएको बताए । उनले सबैलाई आफ्नो सुरक्षामा सचेत रहन र ठगीको जोखिममा रहेका साथीहरु र आफन्तलाई पनि सजग बनाउन अनुरोध गरे ।
यसअघि नै कोरोना भाइरससँग सम्बन्धित ठगीबाट हजारौँ मानिस ठगिएको एक्सन फ्रड नामक संस्थाले जनाएको छ ।
