लण्डन । बेलायतको वेल्स राज्यमा कोरोना भाइरस नियन्त्रण गर्न आजदेखि १७ दिने लकडाउन शुरु भएको छ ।
आज साँझ ६ बजेदेखि सो लक डाउन शुरु भएको छ ।
लकडाउनमा मानिसहरुले सीमित कार्यका लागि मात्र घरबाट बाहिर निस्कन पाउने छन् । जसमा खानेकुरा वा ओैषधि किन्न, कसैो स्याहार गर्न, व्यायाम गर्न, घरबाट गर्न नसकिने काममा जान मात्र घरबाट निस्कन पाइने छ ।
वेल्स सरकारको यो निर्णयबाट करिब ५०० मिलियन पाउण्ड बराबरको असर वेल्सको अर्थतन्त्रमा पर्ने अर्थशास्त्रीहरुको अनुमान छ ।
लकडाउनमा यदि नातिनातिनीलाई रेखदेख गर्न अरु मानिसहरु उपलब्ध नभएको अवस्थामा हजुरबा हजुरआमाले रेखदेख गर्न पाउने बताइएको छ । यसैगरी, अलग-अलग बसोबास गर्ने दुवै अभिभावकसित बस्न बच्चाहरुले पाउने छन् । यस्तै, केयर होमहरुमा विशेष अवस्थामा जस्तै अन्तिम विदाई जस्ता अवस्थामा भेट गर्न पाइने छ ।
लकडाउनकै बीचमा नोभेम्बर २ देखि प्राथमिक र विशेष विद्यालयहरु खुला हुने छन् । यस्तै, कक्षा ७ र ८ का विद्यार्थीहरु पनि विद्यालय जान पाउने छन् । परीक्षाहरु पनि नियमित संचालन हुने छन् तर विश्वविद्यालयका विद्यार्थीहरुलाई भने घर जान निषेध गरिएको छ ।
लकडाउनमा आफ्नो घरका बाहेक अरुसित भेला हुन पूर्ण प्रतिबन्ध लगाइएको छ । घर भित्र, घरबाहिर, पार्कमा, बगैँचामा समेत भेटघाट गर्न रोक लगाइएको छ ।
एक्लै बस्नेहरुले अर्को एक घरका मानिससित भेट गर्न पाउने छन् तर यस्ता व्यक्तिले घर फेर्न भने पाउने छैनन् । यसमा कति नजिक वा टाढाको हुनुपर्ने भन्ने तोकिएको छैन ।
घरबाट कति पटक बाहिर निस्कन पाउने भन्ने बारेमा कुनै सीमा तोकिएको छैन । तर कसरत गर्दा, साइकल चलाउँदा अरुसित घुलमिल हुन पाइने छैन र व्यायामको शुरुवात घरबाटै हुनपर्नेछ ।
सरकारले अति आवश्यकीय बाहेक अन्य पसलहरुलाई बन्द गर्न निर्देशन दिएको छ । सुपरस्टोर, किराना पसल, ओैषधि पसल, बैँक, फ्युनेरल डाइरेक्टर, पोष्ट अफिस, डेन्टल सर्जरी, साइकल पसलहरु, मर्मतका सामान किन्ने पसलहरु, ट्याक्सी सेवा, पेट्रोल स्टेशन, ड्राइ क्लिनिङ सेवा लगायतलाई खोल्न दिइएको छ ।
यस्तै, हेयर सैलुन, ब्यूटी सैलुन, रेस्टुरेन्टहरु (टेकवे मात्र पाइने), पब, क्याफे, बार, गार्डेन सेन्टर, नाइट क्लब, होटल, बेड एण्ड ब्रेकफास्ट, सिनेमा, लाइब्रेरी, म्यूजियम, पर्यटकीय केन्द्रहरु, प्रार्थना गर्ने ठाउँहरु बन्द गरिएका छन् ।
