लण्डन । इङल्याण्डमा कोरोना भाइरसको संक्रमण निरन्तर बढिरहेको तथ्यांकले देखाएको छ ।
बेलायतका राष्ट्रिय तथ्यांक कार्यालयले शुक्रबार जारी गरेको आँकडाअनुसार गतसाता (अक्टोवर १० देखि १६ सम्ममा) इङल्याण्डमा दैनिक ३५ हजार २०० जना संंक्रमित भएका थिए । त्यसभन्दा अघिल्लो साता प्रतिदिन २७ हजार ९०० जना संक्रमित भएका थिए ।
यो संख्या सरकारले सार्वजनिक गरेको तथ्यांकभन्दा धेरै छ । सरकारले विहीबार २१ हजार २४२ जना संक्रमित भएको बताएको थियो ।
सो तथ्यांकअनुसार इङल्याण्डमा प्रति १३० जनामा १ जनालाई कोरोना संक्रमण भएको पाइएको छ । जबकि स्कटल्याण्ड र वेल्समा प्रति १८० जनामा १ जना उत्तरी आयरल्याण्ड प्रति १०० जनामा १ जना संक्रमित भएका छन् ।
कार्यालयका अनुसार सो अवधिमा इङल्याण्डमा ४ लाख ३३ हजार ३०० जना कोरोना संक्रमित भएका छन् ।
तथ्यांकअनुसार सबैभन्दा बढी संक्रमण उत्तर पश्चिम र उत्तर पूर्वी इङल्याण्डमा भएको छ ।
कार्यालयले कोरोना संक्रमणको लक्षण भएका, नभएका घरधुरीबाट र्याण्डम स्याम्पल गरी सो सर्भे गरेको हो ।
कार्यालयले गत दुईसातामा कोरोना संक्रमण सबै उमेर समूहमा बढेको पाइएको उल्लेख गर्दै वयस्क र किशोरहरुमा धेरै उच्च संक्रमण भेटिएको बताएको छ ।
