बेलायतमा घर खरिद-बिक्री कोभिड पूर्वकै अवस्थामा

लण्डन । बेलायतमा घरको किनबेचमा २१ प्रतिशतले वृद्धि भएको छ ।

रोयटर्सका अनुसार सेप्टेम्बर महिनामा मात्र ९८ हजार १० वटा घरको किनबेच भएको थियो। जबकि अगष्टमा ८० हजार ७९०  वटा घरको किनबेच भएको थियो  । विश्लेषकहरुले बेलायतमा घरको किनबेच कोरोना महामारीभन्दा अघिको अवस्थामा पुग्न लागेको आँकलन गरेका छन् ।

गत वर्षको सेप्टेम्बर महिनाको बिक्रीको तुलनामा यस वर्षको बिक्री शुन्य दशमलव ७ प्रतिशत मात्र थोरै रहेको छ । जबकि बैँक अफ इङल्याण्डका अनुसार बेलायतको अर्थतन्त्र सेप्टेम्बरमा कोरोना पूर्वको अर्थतन्त्रभन्दा ९ प्रतिशतले सानो छ ।

घरको लगातारको माग र सरकारले करमा दिएको छुटका कारण घरको बिक्री बढेको अनुमान गरिएको छ ।

बेलायतका अर्थमन्त्री ऋषि सुनकले घरको बिक्री बढ्नाले सरसफाइ गर्नेहरु, घर सिँगार्नेहरु, मर्मत गर्नेहरु सबैले लाभ लिने बताएका छन् ।

बेलायतको राष्ट्रिय तथ्या‌ंक कार्यालयले अगष्ट महिनामा बेलायतमा घरको भाउ साढे २ प्रतिशतले वृद्धि भएको जनाएको छ । उता मोर्गेज प्रदायकहरुमध्ये एक हालिफ्याक्स बैँकले सेप्टेम्बर महिनामा ७.३ प्रतिशतले मोर्गेज आवेदन बढेको बताएको छ । उसले यो वृद्धि सन् २००६ यताकै भएको पनि जनाएको छ ।

घरको माग पहिले लण्डन क्षेत्रमा रहने गरेकोमा महामारीपछि लण्डन र शहरी क्षेत्रहरुभन्दा ग्रामीण र शहरभन्दा बाहिरी क्षेत्रमा सरेको बताइएको छ । घरैबाट काम गर्न सकिने भएकाले यस्तो भएको बताइएको छ ।