लण्डन । बेलायती सेनामा ६५ वर्षसम्म काम गर्न दिइने भएको छ ।
डेली मेलका अनुसार हाल २२ वर्ष सेवा अवधि पुगेपछि सेनाबाट निवृत्त हुनुपर्ने प्रावधान रहेकोमा केही निश्चित सीप भएका सैनिकहरुलाई ६५ वर्षको उमेरसम्म सेवा गर्न दिइने छ । यसबाट बेलायती सेनामा कार्यरत गोरखाहरु पनि लाभान्वीत हुनसक्ने आशा गरिएको छ ।
‘दक्ष जनशक्तिलाई नगुमाउन’ सो व्यवस्था गरिएको बताइएको छ ।
विशेषगरी जासुसी, इन्जिनियरिङ, सर्भेइङ र प्रशासनिक दक्षता भएका सैनिकहरुलाई ६५ वर्षसम्म वा बेलायतमा अवकास पाउने उमेरसम्म सेवा गर्न दिइने छ ।
हाल कायम रहेको व्यवस्थामा ५५ वर्षको उमेरभित्र सेवाबाट अवकास लिनैपर्ने अवस्था छ ।
नयाँ व्यवस्थाले नियमित र जगेडा आर्मीका केही क्षेत्रमा ६५ वर्षको उमेरसम्म सेवा गर्न पाइने निश्चित गरेको छ ।
सेनाले नयाँ व्यवस्थालाई ‘केस वाइ केस’का आधारमा निर्णय गर्ने बताइएको छ ।
जासुसी सेवा र एरोनेटिकल इन्जिनियरिङ सेवाका सैनिकहरुलाई ६५ वर्षको उमेरसम्म सेवा गर्न उत्प्रेरित गरिएको छ ।
लेफ्टिनेण्ट कर्णेल म्याट ब्रोकल्सबीले विशेष सीप भएका सैनिकहरुलाई सामान्य सेवा अवधिभन्दा धेरै वर्ष सेवा गरी सामान्य अवकास पाउने उमेर ६५ वर्षसम्म सेवा गर्ने संयन्त्र बनेको बताएका छन् ।
सन् २०१४ मा सेनाले पूर्व नियमित सेनालाई जगेडा सेनामा भर्ना हुने अधिकतम उमेर ४३ वर्षबाट बढाएर ५२ वर्ष बनाएको थियो । सेनामा जनशक्तिको कमी हुन थालेपछि सो परिवर्तन गरिएको थियो ।
यस्तै विशेष सीपयुक्त सेवामा भर्ना हुन चाहने नागरिकहरुको उमेर पनि ४५ वर्षबाट बढाएर ५० वर्ष पुर्याइएको थियो तर उनीहरु भाषामा र स्वास्थ्य जाँचमा भने पास हुनु पर्नेछ ।
नाम बताउन नचाहने एक सैनिकलाई उद्धृत गर्दै डेली मेलले लेखेको छ, ”हरेक महिना सयाैँ अनुभवी सैनिकहरु गुमाइरहेको बेलायती रक्षा मन्त्रालय बल्ल ब्यँझिए जस्तो छ । कसैलाई ४० वर्ष कट्नासाथ अवकास दिने कसैलाई हजुबा हुन्जेलसम्म सेवा दिने अवस्था देखिएको छ । तर नयाँ निर्णयले सेनालाई राम्रै गर्नेछ ।”
बेलायती रक्षा मन्त्रालयका प्रवक्ताले ‘हामी हाम्रो सेनामा काम गरेका सैनिकहरुको विविधतायुक्त अनुभव र सीपको सम्मान गर्छौं । त्यसैकारण विशेषज्ञता भएका सैनिकहरुको सेवा अवधि लम्ब्याउने दिएका हौँ’ भनेका छन्।
