बेलायती महारानीको प्रतिनिधि बने पूर्व गोरखा सैनिक

लण्डन । बेलायतको स्थानीय स्तरमा बेलायती महारानीको प्रतिनिधि बन्ने दुर्लभ अवसर एक पूर्व गोरखा सैनिकलाई प्राप्त भएको छ ।

बेलायती सेनाबाट अवकासप्राप्त रिटायर्ड मेजर मनिकुमार राई यस्तो अवसर पाउने भाग्यमानी गोरखा भएका छन् । उनलाई महारानीबाट ह्याम्पसायर काउण्टीका लागि डेपुटी लर्ड लेफ्टिनेण्ट पदमा नियुक्त गरिएको छ ।

बेलायतमा हरेक काउण्टी र बोरोहरुमा महारानीको प्रतिनिधिका रुपमा लर्ड लेफ्टिनेण्ट रहेका हुन्छन् । उनीहरुको नियुक्ति महारानीबाट हुने गर्छ । लर्ड लेफ्टिनेण्टहरुले आफ्नो कार्यमा सघाउनका लागि डेपुटी लर्ड लेफ्टिनेण्टहरुको नियुक्त गर्ने गर्छन् । लर्ड लेफ्टिनेण्टको सिफारिसमा डेपुटी लर्ड लेफ्टिनेण्टहरुको नियुक्ति पनि महारानीबाट हुने गर्छ ।

डेपुटी लर्ड लेफ्टिनेण्टहरुको नियुक्ति उनीहरुको स्थानीय र राष्ट्रिय तहमा योगदानका आधारमा हुने बताइएको छ ।

बेलायतमा १५ओैं शताब्दीदेखि लर्ड लेफ्टिनेण्टको परम्परा चलिआएको छ ।

लर्ड लेफ्टिनेण्टको जिम्मेवारी राजपरिवारको स्थानीय क्षेत्रमा भ्रमण हुँदा त्यसको व्यवस्थापन गर्ने, अवार्डहरु प्रदान गर्ने, पदकहरुका लागि सिफारिस गर्ने, नागरिकहरुले आयोजना गरेको कार्यक्रमहरुमा राजपरिवारका तर्फबाट प्रतिनिधित्व गर्ने, स्थानीय जल, स्थल, वायु र सेनाका अन्य टुकडीहरुसित समन्वय गर्ने, स्थानीय स्तरमा राजपरिवारका सदस्यहरुले प्रतिनिधित्व गर्ने संस्थाहरुमा नेतृत्व, सल्लाह र नियुक्ति दिने लगायतका हुन्छन् ।

लर्ड लेफ्टिनेण्टलाई सघाउनका लागि भाइस लर्ड लेफ्टिनेण्ट र डेपुटी लर्ड लेफ्टिनेण्टहरू नियुक्त गरिएका हुन्छन् । ह्याम्पसायरमा प्रति २५ हजार जनसंख्या बराबर १ जना डेपुटी लर्ड लेफ्टिनेण्टको व्यवस्था गरिएको छ ।

उनीहरुको नियुक्ति गैरराजनीतिक हुने र कुनै राजनीतिक दलको जिम्मेवारी नलिएको हुनुपर्ने बताइएको छ । यसरी नियुक्त भएका लर्ड र डेपुटी लर्ड लेफ्टिनेण्टहरु ७५ वर्षको उमेरसम्म पदमा बहाल रहने छन् तर उनीहरुलाई त्यसअगावै महारानीले पदमुक्त भने गर्न सक्ने अधिकार रहन्छ । उनीहरुको जिम्मेवारी स्वय‌ंसेवी हुने छ ।

लर्ड लेफ्टिनेण्टहरुले राजपरिवारलाई निमन्त्रणा गरिएका कार्यक्रमहरुमा राजपरिवारको उपस्थिति हुन नसकेको अवस्थामा राजपरिवारको प्रतिनिधित्व गर्दछन् । उनीहरुलाई राजपरिवार बराबरकै सम्मान, बस्ने ब्यवस्था र सम्बोधन गर्ने गरिन्छ । लर्ड लेफ्टिनेण्टको उपस्थिति नभएको अवस्थामा डेपुटी लर्ड लेफ्टिनेण्टहरुले राजपरिवारको प्रतिनिधित्व गर्छन् र उनीहरुलाई पनि लर्ड लेफ्टिनेण्टलाई गरिने बराबरकै सम्मान, बस्ने ब्यवस्था र सम्बोधन गरिन्छ । यस्तै राजपरिवारका सदस्यहरुलाई कुनै कार्यक्रममा बोलाउनु पर्यो भने भने लर्ड लेफ्टिनेण्टमार्फत निमन्त्रणा गर्न सकिन्छ ।

मेजर रिटायर्ड राई हाल गोरखा ब्रिगेड एसोसिएसनको सचिवका रुपमा कार्यरत छन् । उनले सन् २००५ देखि ग्रासोट्समा गोरखा दरबार नाम गरेको नेपाली रेस्टुरेन्ट पनि संचालन गर्दै आएका छन् । उनले निजी पहलमा विभिन्न च्यारिटीका कामहरु पनि आयोजना गर्ने गरेका छन् ।

गोरखा ब्रिगेड एसोसिएसनका अध्यक्ष डेभिड जी हेजले राईको नियुक्तिले गोरखाहरुको बेलायतलाई दिएको योगदानको कदर गरिएको प्रतिक्रिया दिएका छन् । उनले राई सो जिम्मेवारीका लागि उपयुक्त व्यक्ति रहेको बताए ।

राईले पनि महारानीको प्रतिनिधि बन्नु गौरवको कुरा भन्दै आफ्नो पृष्ठभूमि गोरखा सैनिक र नेपाल भएकाले ती दुवैको पनि प्रतिनिधित्व गर्ने बताएका छन् ।