लण्डन । बेलायतमा रहेका नेपाली समुदायका संघ संस्थामध्ये एक प्रमुख संस्था तमु धिं युकेको नयाँ नेतृत्वका लागि चुनावी प्रक्रिया शुरु भएको छ ।
नयाँ नेतृत्व चयनका लागि गठित निर्वाचन समितिले निर्वाचनसम्बन्धी कार्यतालिका प्रकाशन गरेसँगै सो प्रक्रिया शुरु भएको हो । समितिले प्रकाशन गरेको सूचनाअनुसार मतदाता नामावली प्रकाशन १२ नोभेम्बर २०२० दिउँसो ४ बजे, मतदाता नामावली दावीमाथि विरोध १३ नोभेम्बर २०२० दिउँसो १ बजे, अन्तिम मतदाता नामवली प्रकाशन १३ नोभेम्बर २०२० साँझ ५ बजे हुनेछ ।
यसैगरी, उम्मेदवारी मनोनयन पत्र दर्ता १४ नोभेम्बर २०२० बिहान ११ बजे देखि दिउँसो ४ बजेसम्म, उम्मेदवारीमाथि दावी विरोध १४ नोभेम्बर २०२० साँझ ४.३० देखि ६.३० बजेसम्म र उम्मेदवारी मनोनयन पत्रको नामावली प्रकाशन १४ नोभेम्बर २०२० बेलुकी ७ बजे हुनेछ। उम्मेदवारी मनोनयन नामावलीमाथि दावी विरोध १४ नोभेम्बर २०२० बेलुकी ७.३० बजेसम्म, उम्मेदवारी मनोनयन फिर्ता १४ नोभेम्बर २०२० बेलुकी ८ बजेसम्म र अन्तिम उम्मेदवारी नामावली प्रकाशन १४ नोभेम्बर २०२० बेलुकी ८ बजेदेखि ९ बजेसम्म हुनेछ।
यदि सर्वसम्मतिले नेतृत्व चयन नभएको अवस्थामा पाेष्टल मतदान गर्ने निर्वाचन समितिले जनाएको छ ।
नयाँ नेतृत्वको घोषणा २१ नोभेम्बर २०२० मा हुने साधारणसभामा घोषणा गरिने छ ।
नयाँ कार्यसमितिको अध्यक्ष पदका लागि उम्मेदवारी शुल्क २५० पाउण्ड, तीन उपाध्यक्षका लागि १७५ पाउण्ड र महासचिव तथा अन्य पदाधिकारीहरुका लागि १०० पाउण्ड तोकिएको छ भने कार्यसमिति सदस्य पदका लागि १० पाउण्ड उम्मेदवारी शुल्क तोकिएको छ ।
तमुधिँ युकेले निर्वाचन सम्पन्न गर्न एकेन्द्र गुरुङको संयोजकत्वमा पत्रकार हरि कुमार (काजी) गुरूङ र मेजर कृष्णबहादुर गुरुङ रहेको निर्वाचन समिति गठन गरेको छ ।
