बेलायतको नक्कली वर्क पर्मिट बनाएर ठगी

लण्डन । संयुक्त अधिराज्य बेलायतमा एक होटलमा नक्कली वर्कपरमिट भिजा निकाल्दै एक व्यक्तिले ११ जनासँग करोडौं रुपैयाँ ठगेका छन् । बेलायत मेनचेस्टरस्थित मिडल्याण्ड होटलमा ११ जनालाई वर्क परमिट भिजा मिलाएको नक्कली कागज देखाएर उनले ठगी गरेका हुन् । उनीहरुलाई वर्क परमिट मिलाउँदै अन्तिम छनौट लिष्ट समेत सार्वजनिक गरेको अवस्थामा नेपाल प्रहरीले कुपन्डोलका मनोज भनिने अनुपकुमार सिंहलाई पक्राउ गरेको छ ।

वर्क परमिट पाउनेमा विशाल शाही वेटर, प्रलाद कुमार गुरुङ हेभी ड्राभर, प्रेम प्रसाद सेन सिआर, उमेश थाडाराई लरी ड्राइभर र बाँकी ६ जनालाई वेटर र एक जनालाई फ्रन्ट डेक्स अफिसरको भिजा देखाएर ठगी गरिएको छ ।

बेलायतमा वर्क परमिटको स्पोन्सर लाईसेन्स भएको वा नभएको सजिलै थाहा पाउने बेलायत सरकारको आधिकारिक वेभसाईट https://www.gov.uk/government/publications/register-of-licensed-sponsors-workers मा लग इन गर्ने बित्तिकै थाहा पाइन्छ ।
सिंहको ठगीका बारेमा मनोज अधिकारी र रामकृष्ण खत्रीले प्रहरी परिसरमा जाहेरी दिएका थिए ।

नयाँ पत्रिकाका अनुसार पीडितमध्ये अधिकारीलाई बेलायत र खत्रीलाई अमेरिका लैजाने प्रलोभन दिएका थिए । यसका लागि अधिकारीले साढे १६ लाख रुपैयाँ र खत्रीले पनि १५ लाख रुपैयाँभन्दा धेरै रकम बुझाइसकेका थिए ।

युवालाई फसाउन उनले नेपालस्थित बेलायती दूतावास मातहतको कन्सुलेट कार्यालयको समेत नक्कली लेटरहेड तथा छाप बनाएका थिए । प्रहरीका अनुसार उनले बेलायती सरकार मातहतको श्रम मन्त्रालय र नेपाल सरकार मातहतको श्रम मन्त्रालयबीच श्रम सम्झौता भएको नक्कली कागजात बनाउने गर्थे ।
काठमाडौं परिसरका प्रवक्ता एसपी सोमेन्द्रसिंह राठौरले उनलाई सरकारी कार्यालयको नक्कली लेटरहेड र छापसहित पक्राउ गरिएको बताए । सिंहको कार्यालयमा छापा मार्दा परराष्ट्र मन्त्रालयका नक्कली छाप र लेटरहेड भेटियो,’ प्रवक्ता राठौरले भने, ‘कागजपत्रमा आफैँले हस्ताक्षर गर्ने रहेछ । छाप पनि आफैँ लगाउँदो रहेछ । घटना सम्बन्धमा थप अनुसन्धान हुँदैछ ।’
असनस्थित कार्यालयमा छापा मार्दा प्रहरीले विभिन्न सरकारी कार्यालयको छाप र लेटरहेड बरामद गरेको थियो । श्रमिकका लागि परराष्ट्र मन्त्रालयमार्फत बेलायतबाटै माग आएको भन्दै आफैँ नक्कली मागपत्र बनाउँथे । पत्रमा मजदुरका लागि निर्धारण भएर आएको पारिश्रमिक पत्रसमेत देखाउँथे ।
केही महिनापछि कागजपत्र बुझाउनेलाई फोन सम्पर्क गरेर बोलाउँथे । भिसा आएको भन्दै नेपालस्थित दूतावासका कर्मचारीको हस्ताक्षर र छाप हानिएको कागजपत्र उनीहरूलाई दिन्थे । यसबापत उनले प्रतिव्यक्ति न्यूनतम १६ लाख रुपैयाँ लिएको प्रहरी अनुसन्धानले देखाएको छ । पक्राउ परेका सिंहविरुद्ध सरकारी कागजात किर्ते, ठगी र चेक बाउन्सको मुद्दा चल्ने परिसरका प्रवक्ता एसपी राठौरले बताए ।
प्रहरीले उनको कार्यालयबाट बेलायती सरकार मातहतको श्रम मन्त्रालय र नेपाल सरकारको श्रम मन्त्रालयबीच सम्झौता भएको भन्दै होटेल मिडल्यान्डका लागि मजदुर माग गरिएको मागपत्र बरामद गरेको छ । नेपाल सरकारको परराष्ट्र मन्त्रालयको लेटरहेडमा उल्लेखित मागपत्रमा वैदेशिक रोजगार विभागका उपसचिव सञ्जय रावलको हस्ताक्षर छ । नेपालस्थित बेलायती दूतावासमातहतको कन्सुलेट अफिसको छापसमेत पत्रमा छ । हाल सिंह माथि थप अनुसन्धान भैरहेको छ ।

स्रोत : नयाँपत्रिका