लण्डन । सँगै जिउने, सँगै मर्ने । प्राय दम्पत्तिले यस्तै वाचा गरेका हुन्छन् । तर धेरैको जीवन कसम खाएजस्तो हुँदैन । सँगैसँगै जीवनयापन गरे पनि मरण आफ्नो हातमा हुँदैन । तर बेलायतमा बसोबासरत एक नेपाली दम्पत्तिको भने १२ दिनको अन्तरमा मृत्यु भएको छ र अब दुवै जनाको अन्त्येष्ठी पनि सँगै हुँदैछ ।
लमजुङ भोटेओढार स्थायी घर भई हाल रेडिङमा बसोबासरत पूर्व गोरखा सैनिक चोकबहादुर गुरुङ मुटु तथा मिर्गौला लगायतका रोगबाट थलिएका थिए । गत डिसेम्बरमा बर्कसायर अस्पतालमै उनलाई ब्रेन ह्यामोरेज भयो । त्यसयता चिकित्सककै सल्लाहबमोजिम उनी घरमै आराम गर्दै थिए । तर अचानक मार्च २० तारिख बिहान श्रीमती सुकमाया गुरुङ पो बितिन् हृदयघातबाट आफ्नै निवासमा । फष्ट सेकेण्ड गोरखा राइफल्सका २११५३२९० आर्मी नम्बरका कर्पोरल चोकबहादुरलाई एक्लै पारेर ६७ वर्षीया सुकमाया बिदा भइन् ।
मृत्युपश्चातको आवश्यक प्रशासनिक प्रक्रिया पूरा गरेर परिवार उनको अन्त्येष्ठीका लागि तयारी गर्दै थियो । अन्त्येष्ठीको मिति पनि मिलिसकेको थियो अप्रिल ९ तारिख तर अचानक १ अप्रिलका दिन श्रीमान चोकबहादुरको पनि देहवसान भयो । उनी ८२ वर्षका थिए ।
परिवारका दुवै सदस्यको मृत्यु भएपछि परिवारका सदस्यहरुले योजना बनाए दुवैको बिदाई सँगसँगै गर्ने । संयोगले पहिले श्रीमतीकै अन्त्येष्ठीका लागि तय भएको दिन र समयमा श्रीमानको पनि अन्त्येष्ठीका लागि समय मिल्यो ।
बेलायतमा कोरोनाको महामारीले सबैतिर कार्यालयहरु बन्द भई घरबाटै काम भइरहेको अवस्थामा यी सबै प्रक्रिया पूरा गर्न सजिलो थिएन । त्यसमाथि अहिले कोरोनाका कारण दैनिक सयौंको मृत्यु भइरहेको अवस्थामा प्राकृतिक कारणबाट हुने निधन छायाँमा परिरहेको छ । गुरुङ परिवारका ज्वाइँ कुमार गुरुङले भने, ‘अहिले सबै प्रक्रिया अनलाइन नै हुने रहेछ । यदि मेडिकल रिपोर्ट अपटुडेट छ भने र जीपी, एम्बुलेन्स, पारामेडिक्स सबैलाई खबर गरिएको छ भने प्रशासनिक कार्यमा धेरै समय नलाग्दो रहेछ ।’
कोरोना संक्रमणको आशंकाका कारण अहिले बेलायत सरकारले सामूहिक भेलामा रोक लगाएको छ । जसका कारण गुरुङ दम्पत्तिको अन्तिम सँस्कारमा बढीमा १० जना मात्र सहभागी हुनसक्ने बताइएको छ । गुरुङ दम्पत्तिका २ छोरा ३ छोरी सबै अहिले युकेमै छन् ।
