बेलायतको स्थानीय निर्वाचनमा सफलता चुम्दै नेपाली

लन्डन । बेलायतको संसदीय निर्वाचनमा हालसम्म एकमात्र उम्मेदवार बनेपनि स्थानीय तहमा भने नेपालीमुलका उम्मेदवार सफलतान्मुख छन् ।

बेलायतमा बिहीबार सम्पन्न स्थानीय निर्वाचनमा करिब आधा दर्जन नेपालीले काउन्सिलर पद जिते । हार्ने क्षेत्र रोजेर नेपालीलाई उम्मेदवार बनाइने चर्चा चल्ने गरेपनि यसपटक भने केही उम्मेदवारले पुरानो पकडलाई तोडेर सफलता चाखे ।

नेपालीहरुको उल्लेख्य बसोवास रहेको बेलायतको अल्डरसटमा युवा व्यवसायी प्रवेश केसीले ३२८ मत ल्याएर काउन्सिलर पद जितेका छन् ।

केसीले कन्जरभेटिभ पार्टीका तर्फबाट रसमोर बरो अन्तर्गत अल्डरसट टाउन, वेलिङटन वार्डको काउन्सिलर पदमा उम्मेदवारी दिएका थिए । उनका प्रतिद्वन्द्वी लेबरका उम्मेदवारले २८६ र लिब्डेम उम्मेदवारले जम्मा ८५ मत ल्याए । यसअघि उक्त क्षेत्रमा लेबरले जित्दै आएको थियो ।

त्यसैगरि, केन्टको मेडस्टोन बरो काउन्सिलमा 
लिबरल डेमोक्रयाट्स पार्टीका उम्मेदवार दिनेश खड्काले ८५२ मत ल्याएर विजयी हासिल गरे । उनका प्रतिद्वन्द्वी कन्जरभेटिभका उम्मेदवारले ३६० र लेबर उम्मेदवारले ३४६ मत ल्याएका थिए ।
जितपछि कान्तिपुरसंग कुरा गर्दै काउन्सिलर खड्काले समाज विकास र वातावरणीय व्यवस्थापनमा काम गर्ने अठोट व्यक्त गरेका छन् ।

फुड साइन्स्मा पिएचडी गरिरहेका खड्का १८ वर्षदेखि बेलायतमा छन् । सन् २०१० देखि लिब्डेममा लागेका उनले बेलायतको राजनीतिमा माग भएपनि नेपालीमा दक्षता र श्रोत साधनको अझै कमी रहेको टिप्पणी गरे ।

हेमेल हयाम्सटेड अन्तर्गत डेकोरम बरो काउन्सिलको काउन्सिलर पदमा गोवर्धन सिलवाल ‘सागर’ दोश्रो पटक निर्वाचित भए । कन्जरभेटिभ पार्टीबाट तर्फबाट सिलवालले ७ सय २४ मत प्राप्त गरेका थिए । ललितपुर गोदावरी निवासी सिलवाल विगत २० वर्षदेखि बेलायत बस्छन् ।

उता, नर्थ योर्कसायरको कोलबर्न टाउन काउन्सिलबाट डा. जगन्नाथ शर्मा तेश्रो पटक काउन्सिलर पदमा निर्वाचित भए । कञ्जरभेटिभ पार्टीका उनी उक्त काउन्सिलको पूर्व डेपुटी मेयर 
हुन् । यही मे २० तारिख हुने मेयर निर्वाचनका लागि पनि उनले उम्मेदवारी दिएका छन् ।

त्यसैगरि, केन्टको मिडवेबाट कन्जरभेटिभका टासी तामाङ भुटियाले पनि काउन्सिलर पद जितेका छन् ।

यसपटकको निर्वाचनमा नेपाली मुलका कतिपय उम्मेदवारले लज्जास्पद पराजय पनि भोगेका छन् ।
बेलायतमा नेपाली समुदायबाटै पहिलोपटक सन् २००७ मा काउन्सिलर जितेका धन गुरुङ यसपटक भने पराजित भएका छन् । फोक्सटन एण्ड हिथ 
डिष्ट्रिक्ट काउन्सिलमा कञ्जरभेटिभ पार्टीबाट उम्मेदवार रहेका उनी पहिलोपटक जित्दा लिब्डेममा आवद्ध थिए ।

त्यस्तै, हयाम्पसायरको हार्ट डिष्ट्रिक्ट काउन्सिलमा लिला सेलिङ माबो पनि काउन्सिलर पदमा पराजित भइन् । लेबर पार्टीकी उम्मेदवार लिलाले जम्मा १ सय २९ मत पाउंदा विजयी उम्मेदवारले १८ सय ३२ मत ल्याए । लिलाले यसअघि पनि पराजय भोगेकी थिइन् ।

उता गिल्डफोर्डबाट निर्वाचन लडेकी लेबर पार्टीकी उम्मेदवार २२ वर्षीया आकांक्षा गुरुङले पनि पराजय भोग्नु परेको छ । निर्वाचित कञ्जरभेटिभ पार्टीका उम्मेदवारले ३ सय ९२ मत ल्याएकामा उनले ६३ मतमात्र पाइन् ।

पूर्व काउन्सिलर स्वर्गीय गमबहादुर गुरुङकी छोरी आकांक्षाले उम्मेदवारी दिंदा कलिलै उमेरमा 
राजनीतिमा प्रवेश गरेको भन्दै निकै चर्चा भएको थियो ।

एनआरएनए केन्द्रिय उपाध्यक्ष कुल आचार्य बेलायतको राजनीतिमा प्रवासी नेपालीहरुको बढ्दो सहभागिताले नेपाली डायष्पोरा थप बलियो हुंदै जाने विश्वास व्यक्त गर्छन् ।

इंग्ल्याण्डका २४८ काउन्सिलमा भएको निर्वाचनमा ८ हजार ४२५ सिटका लागि प्रतिष्पर्धा भएको थियो । सत्तारुढ कन्जरभेटिभले यसपटक विगत तुलनामा १२ सय भन्दा बढि काउन्सिलमा हारेको छ ।

प्रतिक्रिया

सम्बन्धित सामाग्री