ध्रुव केसी
लन्डन । इतिहास बोकेको युरोपकै सबैभन्दा पुरानो सामाजिक संस्था ‘यती नेपाली एसोसिएसन यूके’ को अध्यक्षमा ध्रुव केसी निर्विरोध निर्वाचित भएका छन् । २८ अप्रिल आइतबार गोल्डेनसीप रेस्टुराँमा, साउथ हयारोमा सम्पन्न अधिवेशनले केसीलाई २९ औं कार्यसमितिका लागि निर्विरोध अध्यक्ष चुनेको हो ।
केसी सन् १९८२ देखि यतीको सामाजिक सचिव, कोषाध्यक्ष, ७ वर्ष महासचिव र ५ वर्ष उपाध्यक्ष भएर काम गरिसकेका थिए । उनी डा. राघवप्रसाद धिताल, खगेन्द्र नेपाली र डा. कुमुद धिताल अध्यक्ष भएका बेला यतीमा ‘ब्याक बोन’ थिए ।
केसीले यतीले विगतमा मनाउने गरेको मुख्य चाडपर्व, खेलकुद, च्यारिटी गतिविधिलाई निरन्तरता र सदस्यता विस्तार मुख्य प्राथमिकता रहेको बताए ।
सन् १९७४ मा लन्डन आएका केसीले २१ वर्ष नेपाल पर्यटन बोर्डको यूके दूत भएर काम गरे भने उनी नेपलिज क्याटरिङ एसोसिएसन यूकेका संस्थापक अध्यक्ष पनि हुन् । ब्रिटेन नेपाल टुरिजम अर्गनाइजेसन यूकेका संस्थापक अध्यक्ष र किङडम इन हिमालय म्यागेजिनको प्रकाशक पनि थिए केसी ।
वरिष्ठ उपाध्यक्षमा बाचस्पति रेग्मी, उपाध्यक्ष जीवन सेन, महासचिव डा. मुकुन्द बास्तोला, सह-महासचिव कृष्ण पौडेल, कोषाध्यक्ष देव गुरुङ, सामाजिक सचिव जित रानाभाट, सांस्कृतिक सचिव माया केसी, प्रकाशन सचिव काशीराज बोहोरा र सदस्यमा तिलक भट्टराई चुनिए । रिक्त ६ सदस्य पछि थपिने बताइएको छ । यतीमा जम्मा ९७ जना साधारण सदस्य छन् ।
कार्यक्रममा निवर्तमान अध्यक्ष शशीधर नेपालले आफ्नो कार्यसमिति, निर्वाचन समिति र अधिवेशन सम्पन्न गराउन खटिने समाजसेवी अग्रहजहरु मदन थापा, हरि केसी, सोलिसिटर राजु थापा, चित्रबहादुर गुरुङलगायतलाई धन्यवाद दिएका थिए ।
अधिवेशनले तीन संरक्षक र ११ जना सल्लाहकार राख्ने व्यवस्था र अध्यक्षमा उठ्न एक कार्यकाल काम गरेको हुनुपर्ने विधान संशोधन गरेको छ ।
यती निर्वाचन गराउन निर्वाचन समिति संयोजक आर के त्रिपाठी, सदस्यहरु उमेशराज मोक्तान र क्याप्टेन रत्न श्रेष्ठ जुटेका थिए । सन् १९६० मा स्थापित यतीको संस्थापक अध्यक्ष वरिष्ठ राजनीतिज्ञ पशुपति शमशेर जबरा हुन् ।
तस्विर- शिव भण्डारी
