ब्रिटिश सेनामा नेपालीको आकर्षण झन् बढि, यो वर्ष ४०० जना ल्याउने तयारी

लन्डन । ब्रिटिश सेनामा नेपालीको आकर्षण झन् बढ्दै गएको छ । यो वर्ष नेपालबाट बेलायत आउने युवाको संख्या बढ्ने भएको समाचारमा जनाइएको छ । गोर्खा इन्टेक २०१९ का लागि नेपालमा छनोट प्रक्रिया जारी छ । यसवर्ष सन् १९८५ यताकै सबैभन्दा बढि युवा ब्रिटिश आर्मीमा भर्ती हुने भएका छन् ।

बेलायतले ब्रिटिश सेनामा संख्या बढाउने सहमति गरेपछि शुरुमा भनिएको ३२० को सट्टा ३३ वर्षमा गोर्खा कम्पनीले ४०० जना भन्दा बढिलाई छानेर ल्याउने तयारी गरेको ‘दि फोर्सेस टिभी’ ले जनाएको छ ।

गत सेप्टेम्बरमा आ-आफ्नो क्षेत्रबाट पहिलो चरणमा १० हजार आवेदकमध्येबाट ५८० जना छानिएको थियो । ति अन्तिम प्रतिष्पर्धाका लागि पोखरा आएका छन् ।

‘फाइनल एसेसमेन्ट’ का लागि आएका युवाले ज्यादै कठिन चरण पार गर्नुपर्नेछ । सिट अप, पुल अप लगायत डोको दौड जस्ता अप्ठ्यारा कोर्स पार गरेपछि ब्रिटिश आर्मीमा छान्ने प्रचलन छ ।

२५ किलो बालुवा डोकोमा राखेर पहाड पहाड दौड्ने परीक्षा भर्ती छनोटमा सबैभन्दा कठिन र डरलाग्दो ठानिन्छ । डोको 
दौड सन् १९८९ देखिमात्र ल्याइएको हो ।

उता, ब्रिटिश आर्मी संख्या घट्दै गएकामा चिन्ताको विषय बनेको छ । बेलायती प्रधानमन्त्री टेरेजा मेले आर्मड फोर्सेस छाड्ने सैनिकहरुको संख्या बढ्दै गएपछि यसबारे अनुसन्धान गर्न निर्देशन दिएकी छन् । गत वर्षमात्र ८ हजारभन्दा बढिले मिलिट्री करिअर छाड्ने निर्णय लिएका थिए । प्रधानमन्त्री मेले डिफेन्स सेलेक्ट कमिटीका सदस्य मार्क फ्रान्क्वांलाई यस मुद्दा हेर्न निर्देशन दिएकी छन् । मार्कले आर्मड फोर्सेसमा धेरै मानिस सहभागी गराउन महत्वपूर्ण भएको जनाउंदै प्रधानमन्त्रीले आफूलाई कसरी यसमा सुधार गर्न सकिन्छ भन्नेबारे अध्ययन गर्न भनेको उल्लेख गरे ।

गत वर्ष १३ हजार जना ब्रिटिश आर्मड फोर्समा प्रवेश गरेका थिए ।